Müstəqil Azərbaycanın Sərhəd Qoşunlarının ilk komandanı, general-mayor İsgəndər İmanverdi oğlu Allahverdiyev dəfn edilib.
Qanuntv.az xəbər verir ki, general-mayor İsgəndər Allahverdiyevin dəfn mərasimi Hərbi Memorial Məzarlıqda keçirilib. Mərasimdə mərhumun ailə üzvləri və yaxınları ilə yanaşı, Dövlət Sərhəd Xidmətinin, Müdafiə Nazirliyinin və Dövlət Təhlükəsizliyi Xidmətinin rəhbər heyəti, hərbi qulluqçular, veteran sərhədçilər, dövlət qurumlarının əməkdaşları və ictimaiyyət nümayəndələri iştirak ediblər.
Mərasimdə İsgəndər Allahverdiyevin Azərbaycan dövlətçiliyinə, təhlükəsizlik və sərhəd mühafizəsi orqanlarında xidmətlərinə toxunulub, onun xatirəsi ehtiramla yad edilib.
Fotolardan məlum olub ki, dəfn mərasimində Dövlət Təhlükəsizliyi Xidmətinin rəisi Əli Nağıyev, müdafiə naziri Zakir Həsənov və Dövlət Sərhəd Xidmətinin rəisi Elçin Quliyev də iştirak ediblər.
Qeyd edək ki, İsgəndər Allahverdiyev 11 fevral 1947-ci ildə Bakı şəhərində anadan olub. O, Azərbaycan dövlət sərhədinin mühafizəsi sisteminin formalaşmasında mühüm xidmətləri olan hərbçilərdən biri kimi tanınıb.
İsgəndər Allahverdiyev 1991-1992-ci illərdə Azərbaycan Respublikası Dövlət Sərhədini Mühafizə Komitəsinin sədri vəzifəsində çalışıb. 1992-ci ildə general-mayor ali hərbi rütbəsinə layiq görülüb.
Həmin ildən Azərbaycan Respublikası milli təhlükəsizlik nazirinin müavini və Azərbaycan Sərhəd Qoşunlarının ilk komandanı kimi fəaliyyət göstərib. 1992-1994-cü illərdə Azərbaycan sərhəd xidmətinin təşəkkülü və inkişafında iştirak edib.
Sərhəd mühafizəsinin formalaşması və inkişafında mühüm xidmətləri olmuş, "Azərbaycan Bayrağı" ordenli general-mayor İsgəndər Allahverdiyevin vəfatı ilə bağlı ailəsinə, yaxınlarına və hərbçi yoldaşlarına dərin hüznlə başsağlığı verilib.
