Ermənistanın baş naziri Nikol Paşinyan Cənubi Qafqazda sülhün bərqərar olunmasına verdiyi töhfəyə görə Azərbaycan Prezidenti İlham Əliyevə minnətdarlığını bildirib.
QanunTV.az xəbər verir ki, Paşinyan bu barədə Almaniyanın Visbaden şəhərində Hessen Sülh Mükafatının təqdimolunma mərasimində çıxışı zamanı danışıb.
Ermənistan hökumətinin yaydığı məlumata görə, Paşinyan çıxışında İlham Əliyevin də həmin mükafata layiq olduğunu qeyd edib və Azərbaycan Prezidentinə təşəkkürünü ifadə edib.
Ermənistanın baş naziri, həmçinin Ermənistan və Azərbaycan xalqlarına təşəkkür edərək, münaqişənin yaratdığı çətinliklərə, insan itkilərinə və əziyyətlərə baxmayaraq, xalqların sülhü qəbul etdiyini və dəstəklədiyini bildirib.
Paşinyanın sözlərinə görə, Ermənistan-Azərbaycan münasibətlərində sülh prosesinin əsasını 2025-ci il avqustun 8-də Vaşinqtonda keçirilən sammit zamanı İlham Əliyev və Nikol Paşinyanın ABŞ Prezidenti Donald Trampın iştirakı ilə qəbul etdiyi birgə bəyannamə təşkil edib.
Baş nazir 2024-cü ildə Ermənistan və Azərbaycanın sərhədlərin delimitasiyası və demarkasiyası üzrə komissiyaların birgə fəaliyyəti haqqında reqlamenti imzalayıb ratifikasiya etdiyini də xatırladıb. O bildirib ki, sənəddə 1991-ci il Alma-Ata Bəyannaməsi sərhədlərin delimitasiyası və demarkasiyasının əsas prinsipi kimi müəyyənləşdirilib.
Paşinyan qeyd edib ki, bu prinsip Ermənistan və Azərbaycanın bir-birinin ərazi bütövlüyünü və suverenliyini tanımasını nəzərdə tutur. Onun sözlərinə görə, eyni prinsip iki ölkə arasında sülh və dövlətlərarası münasibətlərin qurulması haqqında sazişdə də əksini tapıb.
Ermənistanın baş naziri sazişin paraflanmasını və Vaşinqtonda birgə bəyannamənin qəbul edilməsini Azərbaycan-Ermənistan münasibətlərində tarixi irəliləyiş kimi qiymətləndirib.
