Son dövrlərdə xaricdə fəaliyyət göstərən mütəşəkkil kibercinayətkar qruplaşmalar süni intellekt texnologiyalarından istifadə etməklə yeni və daha təkmil kiberhücumlar həyata keçirirlər.
Qanuntv.az xəbər verir ki, bu barədə Dövlət Təhlükəsizliyi Xidməti (DTX) məlumat yayıb.
Məlumata görə, kibercinayətkarlar süni intellekt alqoritmləri və xüsusi proqram təminatları vasitəsilə dövlət qulluqçularını, müxtəlif müəssisə və təşkilatların əməkdaşlarını, eləcə də vətəndaşları hədəfə alırlar.
DTX bildirib ki, çoxsaylı xəbərdarlıqlara və maarifləndirici tədbirlərə baxmayaraq, bəzi vətəndaşlar bu cür dələduzluq hallarına inanaraq kibercinayətkarların qurbanına çevrilirlər.
Qeyd olunub ki, kibercinayətkarlar əvvəlcədən hazırlanmış xüsusi ssenarilər əsasında hədəfə götürdükləri şəxslərə “təcili” və “vacib” məzmunlu mesajlar göndərirlər. Daha sonra zərərçəkənləri aldatmaq məqsədilə onları hüquq-mühafizə orqanlarının və ya digər dövlət qurumlarının adından yaradılmış saxta hesab və səhifələrə yönləndirirlər.
Bu üsulla vətəndaşlardan xarici hesablara pul vəsaitlərinin köçürülməsi, eləcə də müxtəlif qanunsuz tapşırıqların yerinə yetirilməsi tələb olunur.
DTX rəqəmsal mühitdə diqqətli və ayıq-sayıq olmağın vacibliyini vurğulayıb.
Vətəndaşlardan şübhəli müraciət, tələb və ya mesajla qarşılaşdıqları halda dərhal hüquq-mühafizə orqanlarına məlumat vermələri xahiş olunub.
