ABŞ Prezidenti Donald Tramp Venesueladan sonra Kuba, Meksika və Kolumbiyanın da Vaşinqtonun təzyiq və mümkün hərbi müdaxilə hədəfinə çevrilə biləcəyini açıqlayıb. Dövlət katibi Marko Rubio Trampın verdiyi vədləri icra edən lider olduğunu bildirib.
Qanuntv.az xəbər verir ki, politoloq Elxan Şahinoğlu ABŞ-ın Latın Amerikasında artan fəallığının xüsusilə Çini ciddi şəkildə narahat etdiyini vurğulayıb.
Politoloqun sözlərinə görə, ABŞ-ın Kubaya münasibəti 1959-cu il inqilabından sonra kəskinləşib. Vaşinqton uzun illər Kastro rejimini devirməyə çalışsa da, buna nail ola bilməyib. SSRİ-nin dağılmasından sonra isə əvvəlki razılaşmalar faktiki olaraq qüvvədən düşüb. Venesueladan ucuz neft axınının dayanması Kubanın sosial-iqtisadi vəziyyətini daha da ağırlaşdırır. Tramp administrasiyası və Kuba əsilli dövlət katibi Marko Rubionun bu vəziyyətdən siyasi məqsədlər üçün yararlanmaq istəyə biləcəyi istisna edilmir.
Kolumbiyaya gəldikdə, ABŞ bu ölkədə narkokartellərə qarşı keçmişdə də müxtəlif əməliyyatlar həyata keçirib. 1990-cı illərdə Pablo Eskobara qarşı aparılan əməliyyatlarda amerikalı hərbi mütəxəssislər iştirak ediblər. Hazırkı Kolumbiya prezidenti, solçu baxışları ilə tanınan Qustavo Petro Venesuela prezidenti Nikolas Maduronun oğurlanmasına ən sərt reaksiya verən liderlərdən biri olub. Bu səbəbdən Kolumbiyanın Vaşinqton üçün asan hədəf olmayacağı bildirilir.
Meksika ilə bağlı isə ABŞ-ın narkokartellərlə mübarizədə geniş təcrübəsinin olduğu qeyd olunur. Hazırda Amerika həbsxanalarında çoxsaylı meksikalı narkotacir cəza çəkir.
Elxan Şahinoğlu bildirir ki, son proseslərdən ən çox narahat olan ölkə Çindir. Pekin Venesuela neftinin əsas alıcılarından biri olub və Çin şirkətləri bu ölkədə nadir torpaq elementlərinin hasilatında iştirak ediblər. ABŞ-ın dəstəyi ilə Venesuelada hakimiyyət dəyişikliyi baş verərsə, Çin bu iqtisadi üstünlüklərini itirə bilər.
Tramp Venesuela neftinin gələcəkdə Çinə satılmasının mümkün ola biləcəyini desə də, Pekin bu vədə inanmır. Politoloqun fikrincə, Tramp administrasiyasının əsas strateji hədəfi Rusiya yox, məhz Çindir.
Bu fonda Çin Venesuela məsələsini BMT Təhlükəsizlik Şurasında qaldırmağa çalışır və Vaşinqtonun addımlarının ABŞ üçün siyasi və iqtisadi baxımdan baha başa gəlməsinə cəhd göstərəcək. Eyni zamanda Pekin Tayvan ətrafında hərbi aktivliyi artırır. Çin rəhbərliyi Venesueladakı prosesləri əsas gətirərək Tayvan üzərində nəzarəti gücləndirmək planlarını sürətləndirə bilər.
Lakin Tramp administrasiyası Tayvanı ABŞ-ın strateji maraq zonası hesab edir və adanın Çinə təhvil verilməsi ilə bağlı hər hansı planın olmadığını açıq şəkildə nümayiş etdirir.
