Rusiya Federasiyası İstintaq Komitəsi “Azərbaycan Hava Yolları”na (AZAL) məxsus Embraer-190 tipli sərnişin təyyarəsinin Qazaxıstan ərazisində qəzaya uğraması ilə bağlı aparılan istintaqın yekunlaşdığını açıqlayıb.
QanunTV.az xəbər verir ki, bu barədə Rusiya İstintaq Komitəsinin sədri Aleksandr Bastrıkin Azərbaycan Respublikasının Baş prokuroru Kamran Əliyevə ünvanladığı rəsmi məktubda məlumat verib.
Məlumata görə, 25 dekabr 2024-cü il tarixində Bakı–Qroznı marşrutu üzrə uçuş həyata keçirən təyyarə pis hava şəraiti səbəbindən Qroznı hava limanına iki dəfə uğursuz eniş cəhdi edib. Bundan sonra ekipaj ehtiyat hava limanı kimi Qazaxıstanın Aktau şəhərinə yönəlib. Təyyarə eniş zamanı, təxminən saat 09:28-də (Moskva vaxtı ilə) yerə çırpılıb, nəticədə hava gəmisi tamamilə dağılıb və yanğın baş verib.
Qəza nəticəsində 38 nəfər həlak olub, 29 nəfər isə müxtəlif dərəcəli bədən xəsarətləri alıb.
Rusiya tərəfi bildirib ki, aparılan istintaq və toplanmış sübutlar əsasında cinayət işinə xitam verilib. Eyni zamanda zərərçəkənlərə və həlak olanların ailələrinə kompensasiya və sığorta ödənişləri Rusiya qanunvericiliyinə və beynəlxalq öhdəliklərə uyğun şəkildə təşkil olunub.
Bununla yanaşı qeyd edilib ki, qəzanın səbəblərinin tam və obyektiv araşdırılması məqsədilə kompleks aviasiya-texniki məhkəmə ekspertizası təyin olunub. Ekspertiza Dövlətlərarası Aviasiya Komitəsinin mütəxəssisləri tərəfindən aparılır və hələ yekunlaşmayıb. Ekspertiza nəticələrinə əsasən cinayət işinə yenidən baxılması mümkün ola bilər.