2026-2027-ci tədris ili üzrə Azərbaycan Tibb Universitetində (ATU) təhsil haqları ixtisasdan asılı olaraq əvvəlki illə müqayisədə azaldılıb.
Qanuntv.az xəbər verir ki, bu barədə Azərbaycan Tibb Universitetindən məlumat verilib.
Bildirilib ki, yeni tədris ilində təhsil haqlarının azaldılması dövlətin əhalinin sosial rifahının yaxşılaşdırılması və ali təhsilin daha əlçatan olması istiqamətində həyata keçirdiyi siyasətin növbəti mərhələsidir.
Universitetdən qeyd olunub ki, dövlət hesabına təhsil alan tələbələrin təhsil xərcləri də dövlət tərəfindən qarşılanır.
Açıqlamada bildirilib ki, 2024-cü il tarixli 120 nömrəli müvafiq qərara əsasən, ixtisasdan asılı olaraq dövlət sifarişi əsasında təhsil alan hər bir tələbə üçün təhsil xərci 6 000-8 000 manat məbləğində müəyyən edilib.
Həmçinin 2026-2027-ci tədris ili üzrə ATU-ya ödənişli əsaslarla qəbul planının minimuma endirilməsinin ali təhsilin maliyyə baxımından daha əlçatan edilməsinə yönəlmiş siyasətin mühüm göstəricisi olduğu vurğulanıb.
Yeni tədris ili üçün ATU-da illik təhsil haqları belə müəyyənləşdirilib:
- “Tibb” – 5 000 manat
- “Stomatologiya” – 4 500 manat
- “Əczaçılıq” – 4 500 manat
- “Fizioterapiya” – 4 500 manat
- “İctimai səhiyyə” – 4 500 manat
- “Tibb bacısı (qardaşı) işi” – 4 500 manat
Beləliklə, ötən tədris ili ilə müqayisədə “Tibb” və “Stomatologiya” ixtisasları üzrə illik təhsil haqqı 1 500 manat, digər qeyd olunan ixtisaslar üzrə isə 500 manat azaldılıb.
