Avqustun 11-də Azərbaycan Respublikasının Prezidenti İlham Əliyev və birinci xanım Mehriban Əliyeva Əmək və Əhalinin Sosial Müdafiəsi Nazirliyinin tabeliyində olan DOST Agentliyinin Naxçıvan Regional DOST Mərkəzinin açılışında iştirak ediblər.
Qanuntv.az xəbər verir ki, əmək və əhalinin sosial müdafiəsi naziri Anar Əliyev mərkəzdə yaradılan şərait barədə dövlət başçısına və birinci xanıma məlumat verib.
Bildirilib ki, Naxçıvan Regional DOST Mərkəzində əhaliyə 164 növ sosial xidmət göstəriləcək. Mərkəzdə 117 işçinin və 50 könüllünün fəaliyyət göstərməsi, gün ərzində orta hesabla 500-600 vətəndaşın qəbul edilməsi nəzərdə tutulur.
Bütün xidmətlər “Bir pəncərə” prinsipi əsasında təşkil olunub. Bu yanaşma pensiya, əmək və məşğulluq, sosial müavinətlər, əlillik, övladlığa götürmə və digər sosial xidmətlərin vahid məkanda, şəffaf və operativ şəkildə göstərilməsinə imkan verəcək.
Əlilliyi olan şəxslərin tibbi-sosial ekspertizası, fərdi ehtiyaclarına uyğun reabilitasiya vasitələri ilə təminatı və reabilitasiya xidmətlərindən yararlanmaları üçün ixtisaslaşmış müəssisələrə göndərişlərin rəsmiləşdirilməsi də mərkəzdə həyata keçiriləcək.
Prezident İlham Əliyev və birinci xanım Mehriban Əliyeva mərkəzdə nümayiş etdirilən yüksək texnologiyalı protezlərlə də tanış olublar. Bildirilib ki, indiyədək 500-dən çox hərbçiyə 620 yüksək texnologiyalı protez təqdim edilib. Yüksək texnologiyalı reabilitasiya və tibbi-sosial xidmətlər nəticəsində müharibə ilə əlaqədar əlilliyi olan 300-dək şəxsin əvvəlki sağlamlıq imkanlarına qovuşduğu qeyd olunub.
Əlilliyi olan şəxslərin reabilitasiya vasitələri ilə təminatının gücləndirilməsi istiqamətində görülən işlər nəticəsində reabilitasiya vasitələrinin çeşidi 57-dən 130-a çatdırılıb. Bu ilin əvvəlindən etibarən əlilliyi olan şəxslər 300 minədək müxtəlif növ reabilitasiya vasitəsi ilə təmin olunub.
Dövlət başçısı və birinci xanım nazirliyin inklüziv mərkəzlərinin benefisiarları tərəfindən hazırlanmış müxtəlif əl işlərindən ibarət sərgiyə də baxıblar. Sərgidə bədii oyma, xalçaçılıq, dulusçuluq, təsviri incəsənət, vitraj, floristika və digər sənət nümunələri nümayiş etdirilib.
Həssas qruplardan olan şəxslərin yaradıcılıq potensialının üzə çıxarılması və iqtisadi fəallığının dəstəklənməsi məqsədilə yaradılan “dostart.az” portalı vasitəsilə həmin əl işlərinin onlayn satışı həyata keçirilir.
Prezident İlham Əliyevə və birinci xanım Mehriban Əliyevaya Naxçıvan Regional İnformasiya Mərkəzinin bazasında yaradılması nəzərdə tutulan Naxçıvan DOST İnklüziv İnkişaf və Yaradıcılıq Mərkəzinin layihəsi də təqdim olunub.
Qeyd edilib ki, hazırda əlilliyi olan şəxslərə 13 istiqamət üzrə göstərilən sosial bacarıqların inkişafı xidmətlərinin yeni mərkəzdə 20 istiqamətə çatdırılması planlaşdırılır.
Son illərdə Azərbaycanda həyata keçirilən sosial islahatların beynəlxalq səviyyədə yüksək qiymətləndirildiyi, müxtəlif beynəlxalq təşkilatlar tərəfindən 300-dən artıq mükafat və sertifikatla təltif olunduğu bildirilib.
Azərbaycanın birinci xanımı Mehriban Əliyevanın təşəbbüsü ilə yaradılan DOST mərkəzləri sosial xidmətlərin göstərilməsində yeni mərhələnin formalaşmasına imkan verib. Bu mərkəzlərdə indiyədək vətəndaşlara 164 növ xidmət üzrə ümumilikdə 4,6 milyon sosial xidmət göstərilib. Xidmətlərdən məmnunluq səviyyəsinin təxminən 99 faiz olduğu qeyd olunub.
Hazırda DOST şəbəkəsinin ölkə üzrə genişləndirilməsi istiqamətində işlər davam etdirilir. 2026-2027-ci illərdə Naxçıvan Muxtar Respublikasının bütün rayon mərkəzlərində DOST qəbul şöbələrinin yaradılması, 2030-cu ilədək isə ölkə üzrə 18 DOST mərkəzi, 60 şöbə və məntəqədən ibarət geniş xidmət şəbəkəsinin formalaşdırılması nəzərdə tutulur.
