Prezident İlham Əliyev Naxçıvan Muxtar Respublikasının sosial-iqtisadi inkişafının sürətləndirilməsinə dair əlavə tədbirlər haqqında Sərəncam imzalayıb.
Qanuntv.az xəbər verir ki, Sərəncam Naxçıvan Muxtar Respublikasında 2026-2027-ci illərdə alternativ və bərpa olunan enerji mənbələrindən istifadənin genişləndirilməsi, yol, nəqliyyat və təhsil infrastrukturunun yenilənməsi, eləcə də abadlıq-quruculuq işlərinin davam etdirilməsi məqsədi daşıyır.
Sərəncama əsasən, Naxçıvan Muxtar Respublikasının sosial-iqtisadi inkişafının daha da sürətləndirilməsi məqsədilə müxtəlif layihələrin həyata keçirilməsi üçün Azərbaycan Respublikasının dövlət büdcəsindən və Naxçıvan Muxtar Respublikasının büdcəsindən ümumilikdə 258 milyon manat ayrılması nəzərdə tutulub.
Vəsaitin istiqamətləri belə müəyyənləşdirilib:
- 66 milyon manat – Ordubad rayonunun Tivi kəndində Gilançay üzərində ümumi gücü 15,6 MVt olan Tivi Su Elektrik Stansiyasında tikinti-quraşdırma işlərinin davam etdirilməsi üçün “Azərenerji” ASC-yə;
- 70 milyon manat – 156,3 min nəfər əhalinin yaşadığı 26 yaşayış məntəqəsini birləşdirən, ümumi uzunluğu 420 kilometr olan avtomobil yollarının əsaslı təmiri üçün Naxçıvan Muxtar Respublikasının Nazirlər Kabinetinə;
- 25 milyon manat – Naxçıvan Dövlət Universitetində tələbələr üçün 1000 yerlik yataqxana kompleksinin tikintisi məqsədilə Elm və Təhsil Nazirliyinə;
- 15 milyon manat – Naxçıvan, Şərur, Culfa, Ordubad və Şahbuz şəhərlərində yaşayış binalarının əsaslı təmiri üçün müvafiq icra hakimiyyəti orqanlarına;
- 20 milyon manat – Naxçıvan Muxtar Respublikasında ümumilikdə 640 yerlik 5 yeni məktəbəqədər təhsil müəssisəsinin tikintisi üçün Naxçıvan Muxtar Respublikasının Nazirlər Kabinetinə;
- 53 milyon manat – şəhərlərarası ictimai nəqliyyat parkının yenilənməsi məqsədilə Rəqəmsal İnkişaf və Nəqliyyat Nazirliyinə;
- 9 milyon manat – Naxçıvan, Şərur, Culfa və Ordubad şəhərlərində 5335 mənzilə xidmət göstərən 45 istilik qazanxanasının əsaslı təmiri üçün müvafiq icra hakimiyyəti orqanlarına ayrılacaq.
Sərəncamda qeyd olunur ki, qədim tarixi, zəngin mədəniyyəti və dövlətçilik ənənələri ilə seçilən Naxçıvan Muxtar Respublikası Azərbaycanın iqtisadi, siyasi və mədəni həyatında xüsusi yer tutur.
Son illərdə muxtar respublikanın davamlı sosial-iqtisadi inkişafının təmin edilməsi, infrastrukturun və sosial xidmətlərin keyfiyyətinin yüksəldilməsi, əhalinin məşğulluğunun və rifahının yaxşılaşdırılması istiqamətində bir sıra mühüm dövlət proqramları və layihələr həyata keçirilib.
Bu çərçivədə Naxçıvan Regional DOST Mərkəzi inşa edilib, şəhid ailələrinə və müharibə ilə əlaqədar əlilliyi olan şəxslərə daha 68 mənzil ayrılıb.
Naxçıvan şəhərində görkəmli memar Əcəmi Naxçıvaninin abidəsi ucaldılıb, Möminə xatun türbəsində isə bərpa-konservasiya işləri aparılır.
Muxtar respublikanın enerji təhlükəsizliyinin təmin edilməsi istiqamətində də mühüm layihələr həyata keçirilir. Naxçıvan şəhərində Regional Rəqəmsal İdarəetmə və SCADA Mərkəzi, “Naxçıvan” və “Babək” yarımstansiyaları, eləcə də digər enerji infrastrukturu obyektlərinin inşası başa çatdırılıb.
Yaşıl enerji zonası elan olunan Naxçıvanda ümumi gücü 50 MVt olan “Şəms 1” və “Üfüq” Günəş Elektrik stansiyalarının, həmçinin gücü 36 MVt olan “Ordubad” və 15,6 MVt olan “Tivi” Su Elektrik stansiyalarının inşası davam etdirilir.
Naxçıvanın nəqliyyat imkanlarının genişləndirilməsi istiqamətində də işlər görülür. Hazırda 194,2 kilometrlik təkxətli Naxçıvan dəmir yolu xəttinin 7 kilometrlik hissəsində tikinti işləri aparılır.
Bundan başqa, Naxçıvan Sənaye Parkının, Naxçıvan şəhərində 518 mənzilli sosial evlərin və yeni otel kompleksinin tikintisinə başlanılması üçün müvafiq tədbirlər həyata keçirilir.
