Azərbaycanın Naxçıvan Muxtar Respublikasına həyata keçirdiyi strateji siyasət regionun iqtisadi, nəqliyyat və enerji imkanlarının genişləndirilməsi ilə yanaşı, Cənubi Qafqazda formalaşan yeni geosiyasi reallıqların möhkəmlənməsinə də mühüm təsir göstərir.
Qanuntv.az xəbər verir ki, bunu deputat Bəhruz Məhərrəmov açıqlamasında deyib.
Deputat bildirib ki, Prezident İlham Əliyevin Naxçıvana səfərləri və bu çərçivədə həyata keçirilən layihələr muxtar respublikanın Azərbaycanın əsas ərazisi ilə nəqliyyat-kommunikasiya əlaqələrinin gücləndirilməsi baxımından xüsusi əhəmiyyət daşıyır.
Onun sözlərinə görə, Azərbaycanla Naxçıvan arasında birbaşa və fasiləsiz nəqliyyat bağlantısının bərpası, xüsusilə Zəngəzur dəhlizi perspektivi regionun yeni iqtisadi və logistika modelinə keçidini sürətləndirə bilər.
Bəhruz Məhərrəmov qeyd edib ki, nəqliyyat-kommunikasiya layihələrinin genişləndirilməsi Azərbaycan-Türkiyə müttəfiqliyinin iqtisadi və strateji əsaslarını daha da möhkəmləndirəcək:
«“Sözügedən kommunikasiya xəritəsinin genişlənməsi Türkiyə ilə müttəfiqlik münasibətlərini Şuşa Bəyannaməsinin ruhuna uyğun olaraq fiziki və hüquqi müstəvidə tamamlayır, Türk Dövlətləri Təşkilatının geoiqtisadi çəkisini artırır və Ankara-Bakı oxunun Avrasiya coğrafiyasındakı strateji mövqeyini keyfiyyətcə yeni mərhələyə qaldırır”.»
Deputatın sözlərinə görə, İran ərazisindən keçən Araz dəhlizi layihəsi də regionun nəqliyyat arxitekturasında alternativ imkanların formalaşmasına şərait yaradır. Bu layihənin Azərbaycan və İran arasında iqtisadi əlaqələrin genişləndirilməsinə, eləcə də regional nəqliyyat şəbəkəsinin şaxələndirilməsinə töhfə verə biləcəyi bildirilir.
Bəhruz Məhərrəmov Ermənistanın da regional kommunikasiya layihələrinə qoşulmasının Cənubi Qafqazda uzunmüddətli sabitlik baxımından əhəmiyyətli olduğunu vurğulayıb.
Deputat əlavə edib ki, Azərbaycanın Şərq-Qərb və Şimal-Cənub nəqliyyat dəhlizlərinin kəsişməsində yerləşməsi ölkənin tranzit potensialını artırır və Naxçıvanın bu sistemdə mühüm logistika mərkəzinə çevrilməsinə imkan yaradır.
O bildirib ki, yeni nəqliyyat arteriyalarının inkişafı regionun müxtəlif ölkələri və bazarları arasında ticarət əlaqələrinin genişlənməsinə şərait yarada bilər.
Bəhruz Məhərrəmov Naxçıvanın enerji potensialına da diqqət çəkib. Onun sözlərinə görə, muxtar respublikanın “yaşıl enerji” zonasına çevrilməsi və burada yeni istehsal klasterlərinin yaradılması Naxçıvanın iqtisadi strukturunun şaxələndirilməsinə imkan verəcək.
Deputat hesab edir ki, bərpaolunan enerji layihələrinin inkişafı Naxçıvanın gələcəkdə Azərbaycan, Türkiyə, Mərkəzi Asiya və Avropa arasında enerji əməkdaşlığında daha mühüm mövqe tutmasına şərait yarada bilər.
“Beləliklə, Naxçıvan yalnız regional nəqliyyat xəritəsində deyil, həm də enerji və istehsal zəncirlərində mühüm qovşaq kimi formalaşa bilər”, – deyə deputat bildirib.
