Azərbaycanın mobil operatorlarına məxsus nömrələrdən istifadə etməklə saxta sosial şəbəkə və ani mesajlaşma hesabları yaradan mütəşəkkil kibercinayətkar qruplaşmalarla bağlı təhlükəsizlik tədbirləri gücləndirilib.
Qanuntv.az xəbər verir ki, bu barədə Dövlət Təhlükəsizliyi Xidməti (DTX) məlumat yayıb.
Bildirilib ki, Azərbaycan Respublikasının hüdudlarından kənarda fəaliyyət göstərən və xarici vətəndaşların rəhbərlik etdiyi bəzi kibercinayətkar şəbəkələr dövlət qulluqçularını, eləcə də müxtəlif müəssisə və təşkilatların əməkdaşlarını hədəfə alır.
Məlumata görə, cinayətkarlar xüsusi kompüter proqramlarından istifadə etməklə dövlət qurumlarının, müəssisə və təşkilatların rəsmi internet səhifələrindən əməkdaşların əlaqə nömrələrini kütləvi şəkildə əldə edirlər.
Daha sonra həmin şəxslərin telefon nömrələrindən istifadə olunaraq qurum rəhbərlərinin fotoşəkilləri ilə saxta hesablar yaradılır və əməkdaşlara “WhatsApp” vasitəsilə guya təcili xarakterli mesajlar göndərilir.
Saxta hesablar üzərindən şəxslərə müxtəlif tapşırıqlar verilir. Bu tapşırıqlar arasında xarici bank hesablarına pul vəsaitlərinin köçürülməsi və digər qanunsuz göstərişlər də yer alır.
DTX qeyd edib ki, başlanılmış əməliyyat-istintaq tədbirləri çərçivəsində bu cinayət əməllərində iştirak edən bəzi şəxslər müəyyənləşdirilib və onların barəsində beynəlxalq hüquqi prosedur tədbirlərinə başlanılıb.
Hazırda xarici dövlətlərin aidiyyəti qurumları, həmçinin sosial şəbəkə və platformaların aid olduğu beynəlxalq texnologiya şirkətlərinin təhlükəsizlik bölmələri və platforma operatorları ilə əməkdaşlıq çərçivəsində cinayətkar şəbəkənin digər üzvlərinin müəyyən edilərək ifşa olunması istiqamətində kompleks tədbirlər davam etdirilir.
DTX vətəndaşları sosial şəbəkələr və ani mesajlaşma platformaları vasitəsilə daxil olan şübhəli müraciətlərə qarşı diqqətli olmağa və bu cür hallarla rastlaşdıqda dövlət orqanlarını vaxtında məlumatlandırmağa çağırıb.
