Bakının Nəsimi rayonunda, 28 May küçəsində obyektdə başlayan yanğın ətrafdakı mənzillərə keçib.
Qanuntv.az xəbər verir ki, hadisə ilə bağlı Fövqəladə Hallar Nazirliyinin (FHN) “112” qaynar telefon xəttinə məlumat daxil olub. Dərhal əraziyə FHN Dövlət Yanğından Mühafizə Xidmətinin qüvvələri cəlb edilib.
Yanğınsöndürənlərin çevik müdaxiləsi nəticəsində ikimərtəbəli kommunal tipli yaşayış binasının birinci mərtəbəsində fəaliyyət göstərən, ümumi sahəsi 360 kvadratmetr olan obyektdəki yanğın qısa müddətdə söndürülüb.
Yanğın nəticəsində obyektin tavanı, içərisindəki elektrikdoldurma avadanlıqları və 4 velosiped yanıb. Həmçinin binanın ikinci mərtəbəsində ümumi sahəsi 38 kvadratmetr olan ikiotaqlı mənzilin döşəməsi 12 kvadratmetr sahədə, digər 75 kvadratmetr sahəsi olan ikiotaqlı mənzilin döşəməsi isə 9 kvadratmetr sahədə yanıb.
FHN-in məlumatına görə, obyektin və mənzillərin qalan hissəsi yanğından mühafizə olunub.
Hadisə zamanı digər mənzillərdə yaşayan sakinlər təxliyə ediliblər. Bir nəfər tüstüdən zəhərlənərək xəstəxanaya yerləşdirilib.
Yanğının başvermə səbəbləri araşdırılır.
