Azərbaycan Prezidenti İlham Əliyev regional nəqliyyat və iqtisadi əlaqələrin genişləndirilməsi ilə bağlı mühüm açıqlamalar verib.
Dövlətimizin başçısı bildirib ki, yeni nəqliyyat-kommunikasiya xətlərinin açılması nəticəsində Ermənistan Naxçıvan Muxtar Respublikası vasitəsilə İranın, Azərbaycan ərazisi ilə isə Rusiyanın dəmir yollarına çıxış əldə edəcək.
Prezident İlham Əliyev eyni zamanda Qarabağ və Şərqi Zəngəzurda aparılan genişmiqyaslı quruculuq işləri ilə paralel olaraq Naxçıvan Muxtar Respublikasının da kompleks şəkildə inkişaf etdirildiyini vurğulayıb. Onun sözlərinə görə, Naxçıvanda yaşıl enerji, kənd təsərrüfatı, suvarma və turizm sahələrində mühüm layihələr icra olunacaq.
“Qarabağda və Şərqi Zəngəzurda gedən quruculuq işlərinə paralel olaraq Naxçıvan Muxtar Respublikasında da istər yaşıl enerji olsun, istər kənd təsərrüfatı, istər suvarma – indi orada böyük suvarma layihələri icra ediləcək – istər turizm, bu bölgəni biz birləşdirəcəyik. Mən bunu bir daha demək istəyirəm, biz bunu onsuz da edəcəkdik, amma yaxşı ki, bunu sülh yolu ilə edirik”, – deyə Prezident qeyd edib.
Dövlət başçısı vurğulayıb ki, həyata keçirilən layihələr həm ölkədaxili regionların birləşdirilməsinə, həm də Cənubi Qafqazda iqtisadi əməkdaşlığın və nəqliyyat imkanlarının genişlənməsinə mühüm töhfə verəcək.