Ukrayna Prezidenti Volodimir Zelenski Fransanın paytaxtı Parisə səfər edərək “İstəklilər Koalisiyası”nın sammitində iştirak edir. Sammit bu gün – 6 yanvar tarixində keçirilir və dünyanın müxtəlif ölkələrinin liderlərini bir araya gətirir.
Qeyd olunur ki, bu görüşün əsas məqsədi Ukraynaya təhlükəsizlik zəmanətləri, hərbi və siyasi dəstəyin möhkəmləndirilməsi, həmçinin Rusiya ilə davam edən münaqişəyə dair sülh planlarının müzakirəsidir.
Sammit çərçivəsində Zelenski və Fransa Prezidenti Emmanuel Makron arasında ikitərəfli görüş planlaşdırılıb, daha sonra isə digər iştirakçı dövlət rəhbərləri ilə müzakirələr olacaq. Ayrıca, Fransa Prezidenti Makronla görüşdən əvvəl ABŞ nümayəndələri – xüsusi elçi Steve Witkoff və Jared Kushner ilə də iş naharı keçiriləcək.
Sammitdə təqribən 35 ölkə və beynəlxalq təşkilatın nümayəndəsinin iştirakı gözlənilir. Parisdə keçirilən bu yığıncaq “İstəklilər Koalisiyası” formatı çərçivəsində keçirilən ilk belə toplantılardan biridir və yüksək səviyyədə qarşılıqlı dəstək mesajı daşıyır.
Tədbirin gündəliyində həmçinin gücləndirilmiş təhlükəsizlik zəmanətləri, diplomatik təşəbbüslərin dəstəklənməsi, həmçinin müharibədən sonrakı bərpa və iqtisadi əməkdaşlıq məsələləri də yer alır.
“İstəklilər Koalisiyası” 30–dan çox ölkənin birgə dəstəyini ifadə edən formatdır və əsasən Ukraynaya davamlı təhlükəsizlik təminatları verilməsi, onun suverenliyinin qorunması və sülh prosesinə dəstək məqsədilə yaradılıb.
