2026-cı il avqustun 5-də Azərbaycan Respublikası Ali Məhkəməsinin Cinayət kollegiyasının hakimi Şahin Yusifovun təqaüdə yola salınması münasibətilə mərasim keçirilib.
Qanuntv.az xəbər verir ki, tədbirdə çıxış edən Ali Məhkəmənin və Məhkəmə-Hüquq Şurasının sədri İnam Kərimov Şahin Yusifovun uzun illəri əhatə edən zəngin peşə fəaliyyətindən bəhs edib.
Bildirilib ki, Şahin Yusifov uzun müddət məhkəmə-hüquq sistemində müxtəlif məsul vəzifələrdə çalışaraq ölkədə ədalət mühakiməsinin inkişafına mühüm töhfələr verib. O, 2007-ci ildən Azərbaycan Respublikası Ali Məhkəməsinin hakimi, 2010–2020-ci illərdə isə Ali Məhkəmənin Cinayət Kollegiyasının sədri vəzifəsində fəaliyyət göstərib.
Qeyd olunub ki, peşəkar hakim kimi Şahin Yusifovun məhkəmə sisteminin təkmilləşdirilməsi, qanunun aliliyinin təmin olunması və məhkəmə təcrübəsinin inkişafı istiqamətində xidmətləri yüksək qiymətləndirilir.
Tədbirdə vurğulanıb ki, onun fəaliyyəti dövlət tərəfindən daim diqqətdə saxlanılıb. Azərbaycan Respublikasının Prezidenti İlham Əliyevin müvafiq sərəncamları ilə Şahin Yusifov "Tərəqqi" medalı, eləcə də II dərəcəli "Vətənə xidmətə görə" ordeni ilə təltif olunub.
Çıxışlar zamanı Şahin Yusifovun zəngin hüquqi bilik və təcrübəsinin bundan sonra da gənc hüquqşünasların və yeni nəsil hakimlərin yetişməsində mühüm rol oynayacağına əminlik ifadə edilib.
Sonda çıxış edən Şahin Yusifov ona göstərilən yüksək etimada və fəaliyyətinə verilən dəyərə görə təşəkkürünü bildirib, uzun illər ərzində qazandığı peşəkar təcrübə və xatirələrini tədbir iştirakçıları ilə bölüşüb.
