Ermənistan artıq öz inkişafı üçün Azərbaycan və Türkiyə ilə əməkdaşlığın həyati əhəmiyyət daşıdığını dərk edir.
Qanuntv.az xəbər verir ki, bunu Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Türkiyənin "Milliyet" qəzetinə müsahibəsində bildirib.
Hikmət Hacıyev qeyd edib ki, Cənubi Qafqazda hazırda hökm sürən sülh region üçün mühüm əhəmiyyət daşıyır.
Onun sözlərinə görə, əgər Ermənistan-Azərbaycan münaqişəsi davam etsəydi, regionda və qonşu coğrafiyalarda baş verən münaqişələrin təsirləri Cənubi Qafqaza da sirayət edə bilərdi. Prezidentin köməkçisi vurğulayıb ki, Azərbaycan sülh prosesinə yalnız bəyanatlarla deyil, konkret addımlarla sadiqliyini nümayiş etdirib.
Hikmət Hacıyev bildirib ki, Azərbaycanın təşəbbüsləri nəticəsində 2023–2025-ci illər ərzində cəmi iki il ərzində sülh sazişinin mətni hazırlanıb.
O, Avropada sülh proseslərinin uzun illər çəkdiyini xatırladaraq, Fransa ilə Almaniya arasında İkinci Dünya müharibəsindən 17-18 il sonra Yelisey Müqaviləsinin imzalandığını misal göstərib və Azərbaycanın qısa müddətdə mühüm nəticə əldə etdiyini vurğulayıb.
Prezidentin köməkçisi Ermənistan rəhbərliyinin irəli sürdüyü "həqiqi Ermənistan" konsepsiyasını da müsbət qiymətləndirərək bildirib ki, ölkədə yeni Konstitusiya qəbul edildikdən sonra Azərbaycanla sülh müqaviləsinin imzalanması üçün heç bir maneə qalmayacaq.
O əlavə edib ki, məqsəd Azərbaycan-Ermənistan və Türkiyə-Ermənistan normallaşma proseslərini paralel şəkildə inkişaf etdirərək yekun sülhə nail olmaqdır.
Hikmət Hacıyevin sözlərinə görə, Ermənistan rəhbərliyi artıq uzun illər davam edən işğal siyasətinin ölkəyə ciddi ziyan vurduğunu anlayır və inkişaf üçün Azərbaycan və Türkiyə ilə münasibətlərin vacibliyini qəbul edir.
Prezidentin köməkçisi Zəngəzur dəhlizinə də toxunaraq bildirib ki, bu layihə yeni geosiyasi reallığın ayrılmaz hissəsinə çevrilib. Onun sözlərinə görə, dəhlizin açılması həm Azərbaycanın, həm də Ermənistanın iqtisadi və tranzit maraqlarına cavab verir.
Hikmət Hacıyev qeyd edib ki, ABŞ və Ermənistan arasında imzalanan ortaq bəyannamədə "Tramp dəhlizi" kimi təqdim olunan layihə ilə bağlı razılaşma mövcuddur. O bildirib ki, ABŞ tərəfinin verdiyi məlumata əsasən, texniki-iqtisadi əsaslandırma işlərinin bu yay başa çatdırılması və daha sonra tikinti mərhələsinə başlanılması planlaşdırılır.
Sonda o vurğulayıb ki, Azərbaycan və Türkiyə artıq regionda əsas nəqliyyat və enerji layihələrini reallaşdırıb. Ermənistan da bu regional infrastruktur layihələrinin bir hissəsi olmaq istəyərsə, bunun üçün imkan mövcuddur.
