Magistratura pilləsinə qəbul olunan bakalavrların ali təhsil müəssisələri üzrə qeydiyyatı avqustun 3-dən etibarən elektron qaydada həyata keçiriləcək.
Qanuntv.az xəbər verir ki, qeydiyyat prosesi yalnız my.gov.az portalı üzərindən aparılacaq. Bunun üçün Elm və Təhsil Nazirliyinin müvafiq elektron xidməti "mygov" platformasında istifadəyə verilib.
Qeydiyyat 3 avqust saat 15:00-dan 12 avqust saat 18:00-dək davam edəcək.
Magistraturaya qəbul olunan şəxslər əvvəlcə mygov ID vasitəsilə şəxsi kabinetlərinə daxil olmalı, daha sonra "Xidmətlər" bölməsinin "Qurumlar" kateqoriyasından Elm və Təhsil Nazirliyini seçərək "Ali və orta ixtisas təhsil müəssisələrinə təhsilalanların qeydiyyatı" xidmətindən istifadə etməlidirlər.
Qeydiyyat zamanı bakalavrlar şəxsi və qəbul məlumatlarını təsdiqləyərək tələb olunan məlumatları sistemə daxil edib müraciətlərini göndərə biləcəklər.
Namizədlər müraciətlərinin statusunu "mygov" platformasındakı şəxsi kabinetləri vasitəsilə real vaxt rejimində izləyə bilərlər. Müraciət "Ödəniş gözlənilir" statusunda olduqda təhsil haqqını "Onlayn ödə" funksiyası ilə ödəmək və ya ödənişi təsdiq edən qəbzi sistemə yükləmək mümkündür.
Təhsil müəssisəsi müraciəti yoxlayıb təsdiqlədikdən sonra qeydiyyat prosesi başa çatmış hesab olunur və bakalavr rəsmi şəkildə magistr tələbəsi statusu qazanır. Qeydiyyatın təsdiqlənməsi barədə vətəndaşa "mygov" platforması üzərindən bildiriş göndəriləcək.
