Azərbaycan Bosniya və Herseqovina, həmçinin Sinqapurun ümumvətəndaş pasportuna malik vətəndaşları üçün ölkəyə girişdə viza tələbini müvəqqəti olaraq ləğv edib.
Qanuntv.az xəbər verir ki, bu barədə Dövlət Miqrasiya Xidməti məlumat yayıb.
Məlumata görə, vətəndaşların səyahət imkanlarının genişləndirilməsi, ölkələr arasında əməkdaşlığın möhkəmləndirilməsi və turizmin inkişafının təşviqi məqsədilə Bosniya və Herseqovina və Sinqapur vətəndaşları 2026-cı il avqustun 1-dən 2027-ci il avqustun 1-dək Azərbaycan Respublikasına turizm məqsədilə vizasız səfər edə biləcəklər.
Yeni qaydalara əsasən, qeyd olunan ölkələrin vətəndaşları həmin müddət ərzində Azərbaycana üç dəfə vizasız daxil olmaq hüququ əldə edirlər. Onlar hər səfər zamanı ölkə ərazisində 30 günədək qala bilərlər.
Dövlət Miqrasiya Xidməti bildirib ki, Azərbaycana turizmdən fərqli məqsədlərlə gəlmək və ya ölkədə daha uzun müddət qalmaq istəyən Bosniya və Herseqovina, eləcə də Sinqapur vətəndaşları qanunvericiliyə uyğun qaydada müvafiq viza almalıdırlar.
Xatırladılıb ki, Azərbaycan ərazisində 15 gündən artıq müvəqqəti olan əcnəbilərin Miqrasiya Məcəlləsinin tələblərinə uyğun olaraq olduqları yer üzrə qeydiyyata alınması məcburidir.
Bundan əlavə, qanunvericilikdə nəzərdə tutulan əsaslar olduğu halda əcnəbilər müvəqqəti olma müddətinin uzadılması və ya müvəqqəti yaşama icazəsinin verilməsi üçün "ASAN xidmət" mərkəzlərində fəaliyyət göstərən "Miqrasiya xidmətləri" pəncərəsinə fiziki qaydada və ya Dövlət Miqrasiya Xidmətinin elektron xidmətləri vasitəsilə onlayn müraciət edə bilərlər.
