Dövlət İmtahan Mərkəzinin (DİM) sədri Məleykə Abbaszadə 2026-cı il üzrə ali təhsil müəssisələrinə qəbul zamanı ixtisas qrupları üzrə gözlənilən keçid balları ilə bağlı proqnozları açıqlayıb.

Məleykə Abbaszadə bildirib ki, birinci ixtisas qrupu üzrə 600-dən yuxarı keçid balı olan ixtisaslarda keçid ballarının 1-2 bal azalacağı gözlənilir. Onun sözlərinə görə, 500-600 bal intervalında təxminən 16 bala qədər azalma, 400-500 bal aralığında isə 5 baladək enmə proqnozlaşdırılır. Bununla yanaşı, 300-400 bal intervalında nəticə göstərən abituriyentlərin sayının artması səbəbindən bu bal aralığında keçid ballarının yüksələcəyi ehtimal edilir.

DİM sədri qeyd edib ki, ikinci ixtisas qrupu üzrə demək olar ki, bütün bal intervallarında keçid ballarında cüzi azalma gözlənilir. Bu azalma əsasən 1-3 bal arasında dəyişə bilər. 300-400 bal intervalında keçid ballarının 12 bala qədər enməsi mümkün hesab olunur. Lakin 200-300 bal aralığında müsabiqənin güclənəcəyi və nəticədə keçid ballarının 3-4 bal artacağı gözlənilir.

Üçüncü ixtisas qrupu üzrə isə 600-dən yuxarı keçid balı olan ixtisaslarda 3-4 ballıq azalma proqnozlaşdırılır. Eyni zamanda 500-600 bal intervalında rəqabətin artacağı nəzərə alınaraq keçid ballarının 3-4 bal yüksələcəyi bildirilir. Bundan əlavə, 400-500, 300-400 və 200-300 bal intervallarında da keçid ballarında təxminən 1-8 bal arasında artım ehtimalı var.

Məleykə Abbaszadə dördüncü ixtisas qrupu üzrə vəziyyətin daha gərgin olduğunu vurğulayıb. Onun sözlərinə görə, apellyasiya nəticələri hələ açıqlanmasa da, artıq 1000-dən çox abituriyent 600-dən yuxarı bal toplayıb. Bu səbəbdən 600-dən yuxarı keçid balı olan ixtisaslarda keçid ballarının 15-17 bala qədər artacağı gözlənilir. 500-600 bal intervalında da artım proqnozlaşdırılır. 400-500 bal aralığında keçid ballarının əsasən sabit qalacağı, 200-300 bal intervalında isə müəyyən qədər azalacağı bildirilir.

DİM sədrinin sözlərinə görə, yekun keçid balları abituriyentlərin ixtisas seçimləri və apellyasiya nəticələri nəzərə alınmaqla formalaşacaq.