Azərbaycanəsilli finlandiyalı güləşçi Sura Mirac Abbassoy Azərbaycanda güləşməyin və qələbə qazanmağın onun üçün xüsusi hiss olduğunu bildirib.

Qanuntv.az xəbər verir ki, idmançı açıqlamasında gələcəkdə Azərbaycanı beynəlxalq arenada təmsil etmək istədiyini deyib.

“Azərbaycanda güləşmək, qələbə qazanmaq mükəmməl hisslərdir. Hazırda başqa ölkənin bayrağı altında güləşsəm də, gələcəkdə mütləq ölkəmi təmsil edəcəyəm. Hazırda sənədlərdə problem olduğundan ölkəmi təmsil edə bilmirəm. Amma gələcəkdə bu, mütləq olacaq”, – deyə Sura Mirac Abbassoy bildirib.

Güləşçi Azərbaycan vətəndaşlığının da olduğunu qeyd edib. O, imkan olduqca Azərbaycana gələrək burada məşq etdiyini və ötən il Azərbaycan çempionatında qalib olduğunu bildirib.

“İnşallah, sənədlərimi qaydasına salıb, Azərbaycan bayrağı altında güləşəcəyəm”, – deyə idmançı əlavə edib.

Sura Mirac Abbassoy Finlandiyada idmana münasibətin Azərbaycandan fərqli olduğunu da vurğulayıb:

“Finlandiyada idmana diqqət yüksək səviyyədə deyil. Azərbaycanda isə güləşə diqqət çox böyükdür. Azarkeşlər güləşi sevirlər”.

Gənc idmançının gələcəkdə Azərbaycan bayrağı altında beynəlxalq yarışlarda çıxış etmək arzusu ölkəmizin güləş ənənələrinə olan bağlılığını da nümayiş etdirir.