Hörmüz boğazı ilə bağlı İrana yeni razılaşma təklif olunub. Təklifə əsasən, ticarət gəmilərinin Fars körfəzinə İranın ərazi sularından daxil olması nəzərdə tutulur.
Qanuntv.az xəbər verir ki, bu barədə "The Wall Street Journal" məlumat yayıb.
Məlumata görə, təklif olunan razılaşmaya əsasən, ticarət gəmiləri İran sahilləri yaxınlığındakı dəniz dəhlizindən istifadə etməklə Fars körfəzinə daxil olacaq. Körfəzdən çıxış isə Omanın ərazi sularından keçən marşrut vasitəsilə həyata keçiriləcək və bu istiqamətdə gəmilərdən heç bir rüsum alınmayacaq.
Nəşrin yazdığına görə, Tehran razılaşma çərçivəsində gəmilərin keçidinə görə rüsum toplamaq hüququnun tanınmasını, hücumların yenidən başlamayacağına dair beynəlxalq zəmanətlərin verilməsini, ABŞ-nin dəniz blokadasının aradan qaldırılmasını və İran neftinə tətbiq olunan sanksiyaların yumşaldılmasını tələb edir.
ABŞ və Yaxın Şərq ölkələri isə İranın rüsum tələbinə qarşı çıxaraq, əvəzində Hörmüz boğazında təhlükəsiz gəmiçilik üçün Tehrandan etibarlı təhlükəsizlik zəmanətləri istəyiblər.
Məlumata əsasən, İran İnqilab Keşikçiləri Korpusunun (SEPAH) bəzi nümayəndələri vasitəçilərə bildiriblər ki, Tehran Hörmüz boğazına nəzarət hüququ təmin edilmədən belə bir razılaşmanı qəbul etməyəcək. Həmçinin qeyd olunub ki, İran zərurət yaranacağı təqdirdə aylarla davam edə biləcək hərbi əməliyyatlara hazır olduğunu bəyan edib.
Məsələ ilə bağlı tərəflər arasında danışıqların davam etdiyi bildirilir.
