Leyla Əliyeva və Alena Əliyeva Gəncə şəhər Fizika, riyaziyyat və informatika təmayüllü liseydə fəaliyyət göstərən STEAM mərkəzində, həmçinin Gəncə şəhər 37 nömrəli tam orta məktəbdə olublar.
Qanuntv.az xəbər verir ki, mərkəzlə tanışlıq zamanı Birinci vitse-prezident Mehriban Əliyevanın təşəbbüsü ilə Azərbaycan məktəblərində STEAM (Science, Technology, Engineering, Art, Mathematics) layihəsinin geniş icrasına başlanıldığı qeyd edilib.
Bildirilib ki, STEAM mərkəzi liseyin tərkibində 2021-ci ildən fəaliyyət göstərir və bütün yaş qrupları üçün nəzərdə tutulub. Burada “Robotics”, “Art”, “Science”, “STEAM Kids”, CNC və 3D çap, mexatronika və dron istiqamətləri üzrə sahələr fəaliyyət göstərir.
Diqqətə çatdırılıb ki, mərkəzin imkanlarından yalnız həmin məktəbin deyil, regionun digər məktəblərinin şagird və müəllimləri də istifadə edir. Hər tədris ili 1000-dən çox şagird burada müxtəlif modullar üzrə təlimlərdə iştirak edir.
Qeyd edək ki, 2019-cu ildən tətbiq olunan STEAM layihəsinin əsas məqsədi şagirdlərdə tənqidi və yaradıcı düşünmə, əməkdaşlıq bacarıqlarını inkişaf etdirmək, fənləri real həyat tətbiqləri əsasında vahid modeldə birləşdirməkdir.
Daha sonra Leyla Əliyeva və Alena Əliyeva Heydər Əliyev Fondu tərəfindən əsaslı təmir edilən Gəncə şəhər 37 nömrəli tam orta məktəbdə yaradılmış şəraitlə tanış olublar.
Bildirilib ki, 1969-cu ildə inşa edilən məktəb binası zamanla köhnəldiyindən istifadəyə yararsız vəziyyətə düşüb. 2024-cü ilin noyabrından etibarən Heydər Əliyev Fondu tərəfindən 724 şagirdlik məktəbdə əsaslı təmir işlərinə başlanılıb.
Məktəb binası sinif otaqları ilə yanaşı, fizika, kimya, biologiya laboratoriyaları, informatika, musiqi, tibb otaqları, kitabxana, yeməkxana, akt və idman zalları, həmçinin açıq idman meydançası ilə təchiz olunub.
Təhsil müəssisəsinin həyətində abadlıq və yaşıllaşdırma işləri aparılıb, asfalt örtüyü döşənib, dekorativ ağac və kollar əkilib.
Ziyarət zamanı müxtəlif yaş qruplarına aid 50 uşağa velosiped və təhlükəsizlik ləvazimatları hədiyyə edilib. Azərbaycan Velosiped İdmanı Federasiyasının dəstəyi ilə keçirilən sosial aksiyanın məqsədi region uşaqlarının asudə vaxtını səmərəli təşkil etmək, idmana marağı artırmaq və sağlam həyat tərzini təşviq etməkdir.
