Azərbaycan Respublikasının Prezidenti İlham Əliyev işğaldan azad olunmuş ərazilərə səfəri çərçivəsində Xocavənd rayonunun Xanoba kəndində fərdi yaşayış evlərinin və infrastrukturun bərpası istiqamətində görülən işlərlə tanış olub.

Dövlət başçısına kənddə həyata keçirilən layihələr barədə ətraflı məlumat verilib. Bildirilib ki, Xanoba kəndində müasir standartlara cavab verən fərdi evlərin tikintisi aparılır, eyni zamanda mühəndis-kommunikasiya xətləri – elektrik, qaz, su və kanalizasiya sistemləri yenidən qurulur.

Qeyd olunub ki, kənddə yol infrastrukturu da əsaslı şəkildə yenilənir, əhalinin rahat hərəkəti üçün yeni yollar salınır. Bununla yanaşı, gələcəkdə sakinlərin sosial ehtiyaclarının təmin olunması məqsədilə məktəb, tibb məntəqəsi və digər ictimai obyektlərin inşası nəzərdə tutulur.

Həyata keçirilən bu tədbirlər işğaldan azad edilmiş ərazilərdə icra olunan genişmiqyaslı bərpa və yenidənqurma proqramının tərkib hissəsidir. Görülən işlər “Böyük Qayıdış” strategiyasına uyğun olaraq, keçmiş məcburi köçkünlərin doğma torpaqlarına qayıdışını təmin etməyə yönəlib.