Samuxda 5 nəfərdə qarayara xəstəliyinin əlamətləri aşkarlanıb. İlkin müayinələrin nəticələrinə əsasən, həmin şəxslərdə xəstəliyə şübhə yaradan əlamətlər müəyyən olunub. Hazırda onların müalicəsi Gəncə Şəhər Birləşmiş Xəstəxanasının nəzdində fəaliyyət göstərən Yoluxucu xəstəliklər şöbəsində aparılır.
Məsələ ilə bağlı infeksionist Mərdan Əliyev qarayaranın yayılma yolları, əsas əlamətləri və yoluxma riskləri barədə açıqlama verib.
Mütəxəssisin sözlərinə görə, qarayara çöpşəkilli bakteriyalar tərəfindən törədilən infeksion xəstəlikdir və əsasən heyvanlardan insanlara keçir. İnsandan insana yoluxma isə nadir hallarda baş verir.
Qarayara xüsusilə heyvanlarla və heyvan mənşəli məhsullarla təmasda olan şəxslər üçün risk yaradır. Bu səbəbdən xəstəliyə daha çox qəssablar və heyvanlarla peşə fəaliyyəti çərçivəsində təmasda olan şəxslərdə rast gəlinir.
Qarayaranın əsas əlamətləri hansılardır?
Qarayaranın ən geniş yayılmış forması dəri formasıdır. Dəridə mikrozədələr olduqda xəstə heyvanın qanı və ya ifrazatı ilə təmas nəticəsində bakteriya orqanizmə daxil ola bilər.
İlk mərhələdə dəridə kiçik səpgilər yaranır. Daha sonra həmin səpgilər böyüyərək yaraya çevrilə bilər. Xəstəliyin xarakterik əlamətlərindən biri yaranın mərkəzi hissəsinin kömür kimi qara rəng almasıdır.
Mərkəzdə nekroz sahəsi yarandığı üçün həmin nahiyədə ağrı olmaya bilər. Yaranın ətrafında isə qızartı, şişkinlik və ödem müşahidə edilə bilər.
İnfeksionist bildirib ki, qarayaranın ağciyər və bağırsaq formalarına daha nadir hallarda rast gəlinir. Bu formalar daha təhlükəli hesab olunur və xəstələrin xəstəxana şəraitində müalicəsi vacibdir.
Xəstəlik zamanı hansı tədbirlər görülməlidir?
Mütəxəssisin sözlərinə görə, yoluxmanın mənbəyi müəyyənləşdirilməli, xəstəliyin hansı heyvandan keçdiyi araşdırılmalı və zərurət yarandıqda həmin ərazidə müvafiq sanitar-epidemioloji tədbirlər həyata keçirilməlidir.
Mərdan Əliyev qeyd edib ki, qarayara əsasən heyvanlardan insanlara keçdiyindən və insandan insana yoluxma xarakterik olmadığından, xəstəliyə görə karantin rejiminin tətbiqinə ehtiyac yoxdur.
Qeyd: Şübhəli dəri yarası və ya xəstə heyvanla təmas halında özbaşına müalicə aparmaq əvəzinə, vaxtında tibb müəssisəsinə müraciət etmək vacibdir.
Qanuntv.az
