Azərbaycan Respublikasının Prezidenti İlham Əliyev avqustun 13-də Almaniyanın ölkəmizə yeni təyin olunmuş fövqəladə və səlahiyyətli səfiri Dirk Lölkeni qəbul edib.
Səfir etimadnaməsini dövlət başçısına təqdim edib.
Görüş zamanı Azərbaycan-Almaniya münasibətlərinin hazırkı vəziyyəti və gələcək inkişaf perspektivləri ətrafında geniş fikir mübadiləsi aparılıb.
Prezident İlham Əliyev ötən ay Almaniyaya həyata keçirdiyi rəsmi səfəri məmnunluqla xatırlayaraq, səfər çərçivəsində Almaniya Prezidenti Frank-Valter Ştaynmayer və Kansler Fridrix Merts ilə ikitərəfli əlaqələr, eləcə də beynəlxalq məsələlərlə bağlı faydalı müzakirələrin aparıldığını bildirib.
Dövlətimizin başçısı ölkələrimizin regional sabitlik, təhlükəsizlik və inkişaf məsələləri ilə bağlı mövqelərinin bir çox istiqamətlərdə üst-üstə düşdüyünü qeyd edib. Səfər zamanı əməkdaşlığın yeni istiqamətlərinin müəyyənləşdirildiyini bildirən Prezident İlham Əliyev Berlində imzalanmış **“Azərbaycan Respublikası və Almaniya Federativ Respublikası arasında ikitərəfli tərəfdaşlıq üçün strateji gündəliyə dair Birgə Bəyannamə”**nin əhəmiyyətini vurğulayıb.
Prezident qeyd edib ki, hazırda Azərbaycan və Almaniya arasında bir sıra sahələrdə strateji qarşılıqlı əlaqələrdən danışmaq mümkündür. Ticarət, investisiya və biznes sahələrində mövcud potensialın ikitərəfli münasibətlərin daha da möhkəmləndirilməsinə xidmət etdiyi bildirilib.
Dövlət başçısı Dirk Lölkenin Azərbaycandakı diplomatik fəaliyyətinə Prezident İlham Əliyevin Almaniyaya rəsmi səfərindən sonra başlamasının da münasibətlərin gələcək inkişafı baxımından əhəmiyyətli olduğunu diqqətə çatdırıb və səfirə fəaliyyətində uğurlar arzulayıb.
Qəbul üçün təşəkkürünü bildirən Dirk Lölke ötən il avqustun 8-də Azərbaycan və Ermənistan arasında Vaşinqtonda keçirilmiş Zirvə Görüşünün birinci ildönümü münasibətilə Prezident İlham Əliyevə təbriklərini çatdırıb.
Prezident İlham Əliyev regionda sülh gündəliyinin Azərbaycanın təşəbbüsü ilə formalaşdırıldığını və ölkəmizin bölgədə dayanıqlı sülhün təmin olunması istiqamətində səylərini bundan sonra da davam etdirəcəyini bildirib. Dövlət başçısı bölgədə sülh prosesinin artıq dönməz xarakter aldığını vurğulayıb.
Almaniya hökumətinin Azərbaycan Prezidentinin rəsmi səfərinin nəticələrindən məmnunluq duyduğunu bildirən səfir müzakirə olunan məsələlərin yaxın zamanda praktiki şəkildə həyata keçiriləcəyinə ümidvar olduğunu qeyd edib.
Görüşdə, həmçinin Azərbaycan-Avropa İttifaqı münasibətləri, son dövrdə əlaqələrdə müşahidə olunan müsbət dinamika, Şərq-Qərb nəqliyyat dəhlizinin imkanları və Almaniya şirkətlərinin bu marşrutdan gələcəkdə istifadə perspektivləri müzakirə olunub.
Tərəflər ənənəvi və bərpaolunan enerji, təhsil və digər sahələrdə əməkdaşlığın genişləndirilməsi imkanlarına da toxunublar.
