Rusiyanın Leninqrad vilayətində yerləşən Ust-Luqa limanı ərazisində Ukraynanın pilotsuz uçuş aparatları ilə həyata keçirdiyi hücumlardan sonra böyük yanğın baş verib.
Qanuntv.az xəbər verir ki, hadisə gecə saatlarında qeydə alınıb. Rusiya rəsmilərinin məlumatına görə, hücum nəticəsində limandakı neft terminalında yanğın başlayıb və ərazi dərhal nəzarətə götürülüb.
Bildirilib ki, Leninqrad vilayətinin qubernatoru Aleksandr Drozdenko yanğının söndürülməsi üçün yanğınsöndürənlərin cəlb edildiyini açıqlayıb. İlkin məlumata əsasən, hadisə nəticəsində xəsarət alan olmayıb.
Məlumatlara görə, Ukrayna həmin gecə Rusiyaya qarşı bu il ərzində ən genişmiqyaslı dron hücumlarından birini həyata keçirib. Hücum nəticəsində limandakı neft anbarlarının bir hissəsində alovlanma baş verib.
Qeyd edək ki, Ust-Luqa limanı Rusiyanın Baltik dənizi üzərində yerləşən ən böyük neft ixrac mərkəzlərindən biri hesab olunur və burada baş verən hadisə enerji daşımalarına da təsir göstərə bilər.
