Rusiya Ermənistanın "Cənubi Qafqaz Dəmir Yolu" (CQDY) ilə bağlanmış konsessiya müqaviləsinə xitam verilməsi barədə indiyədək rəsmi müraciət almadığını açıqlayıb.
Bu barədə Rusiyanın baş nazirinin müavini Aleksey Overçuk Avrasiya Hökumətlərarası Şurasının iclası çərçivəsində jurnalistlərin suallarını cavablandırarkən bildirib.
Onun sözlərinə görə, Moskva Ermənistan dəmir yolu sisteminin ayrı-ayrı hissələrinin başqa qurumlara təhvil verilməsi ilə bağlı səsləndirilən təkliflərdən xəbərdardır. Lakin Rusiya tərəfi bu yanaşmanı məqbul hesab etmir.
"Biz bir relsi digər relsdən necə ayırmağın mümkün olduğunu anlamırıq. Lakin belə fikirlər səsləndirilir," – deyə Aleksey Overçuk bildirib.
Baş nazirin müavini xatırladıb ki, 2026-cı ilin yanvar ayında Rusiya Prezidenti Vladimir Putin Ermənistan ərazisində, Naxçıvan sərhədi və Gümrü istiqamətində yerləşən iki dəmir yolu sahəsinin yenidən qurulmasına dəstək verilməsi barədə qərar qəbul edib.
Overçukun sözlərinə görə, Rusiya həmin layihələrin həyata keçirilməsində iştirak etməyə hazır olduğunu bəyan edib və bu istiqamətdə Ermənistan tərəfi ilə müzakirələr aparılıb. Lakin bundan dərhal sonra Ermənistanın baş naziri Nikol Paşinyan Rusiyanın konsessiyada iştirakının ölkənin dəmir yolu sahəsində mümkün rəqabət üstünlüklərinə təsir göstərə biləcəyi ilə bağlı açıqlama verib.
Aleksey Overçuk əlavə edib ki, Ermənistanın Rusiya dəmir yolu sistemi ilə əməkdaşlıq etmədən xarici ölkələrlə nəqliyyat əlaqələrini hansı formada təmin edəcəyini qiymətləndirmək hazırda çətin görünür.
