Bu gün Rusiya ilə Ukrayna arasında başlayan genişmiqyaslı müharibənin dördüncü ili tamam olur.
Qanuntv.az xəbər verir ki, 2022-ci il fevralın 24-də Rusiyanın “xüsusi hərbi əməliyyat” elan etməsi ilə start götürən münaqişə artıq müasir tarixin ən uzunmüddətli və ən qanlı müharibələrindən birinə çevrilib.
Dörd il ərzində tərəflər yüz minlərlə canlı qüvvə və hərbi texnika itkisi verib. Cəbhə xəttində gərginlik davam edir. Ukrayna ordusu Qərb ölkələrindən aldığı hərbi-texniki dəstək hesabına müqavimətini qoruyub saxlayır. Rusiya isə nəzarətə götürdüyü ərazilərdə möhkəmlənməklə yanaşı, yeni strateji istiqamətlərdə irəliləməyə çalışır.
Müharibənin gedişində bir neçə həlledici mərhələ xüsusi diqqət çəkib. İlk il Rusiyanın Kiyevə doğru hücumu və sonradan geri çəkilməsi, eləcə də Ukraynanın Xarkov istiqamətində və Xersonda nəzarəti bərpa etməsi ilə yadda qalıb. Sonrakı mərhələdə döyüşlər əsasən mövqe savaşı xarakteri alıb.
2023-cü ildə Baxmut uğrunda ağır döyüşlər, 2024-cü ildə Avdiivka və ətraf ərazilərdə baş verən şiddətli toqquşmalar cəbhənin ümumi mənzərəsini formalaşdırıb. 2025-ci ildən etibarən isə müharibə əsasən pilotsuz uçuş aparatları və uzaqmənzilli raket zərbələrinin geniş tətbiqi ilə davam edir.
Qeyd edək ki, beynəlxalq ictimaiyyət münaqişənin dondurulması və diplomatik həll yollarının tapılması istiqamətində səylərini artırsa da, tərəflərin mövqeləri arasında ciddi fərqlər qalmaqdadır. Bu isə müharibənin yaxın zamanda başa çatacağı ilə bağlı gözləntiləri zəiflədir.
Ötən 4 il ərzində Ukrayna müharibəsindən lentə alınmış görüntüləri oxuculara təqdim edirik.
