Bakıda taksi sürücüsünün sərnişinlərə qarşı aqressiv davranışı ilə bağlı iddialar geniş müzakirələrə səbəb olub.
Məlumata görə, sərnişinlər sifariş zamanı tətbiq üzərindən üç dayanacaq göstəriblər. Marşrut metronun "Koroğlu" stansiyası, Bakıxanov qəsəbəsi və son olaraq Zığ qəsəbəsini əhatə edib.
İddialara əsasən, "Koroğlu" metrostansiyasının yaxınlığında, "Piramida" adlanan ərazidə sərnişinlərdən biri avtomobildən düşdükdən sonra sürücü digər sərnişinlərdən də nəqliyyat vasitəsini tərk etmələrini tələb edib. O, "Mən üç dayanacağa gedə bilmərəm" deyərək sifarişi davam etdirməkdən imtina edib.
Şikayətçinin sözlərinə görə, sərnişinlər marşrutun sifariş zamanı əvvəlcədən tətbiqdə qeyd olunduğunu bildirsələr də, sürücü aqressiv davranış nümayiş etdirib. İddiaya görə, o, avtomobili yüksək sürətlə idarə edərək qəza şəraiti yaradıb və sərnişinləri ölümlə hədələyərək "Sizi cəhənnəmə aparacağam" ifadəsini işlədib.
Bildirilir ki, hadisə zamanı avtomobildə olan sərnişinlərdən biri 8 aylıq hamilə qadın olub. Yaşanan gərginlik və qorxu nəticəsində onun səhhətinin pisləşdiyi qeyd edilir. Daha sonra sürücünün sərnişinləri "Koroğlu" metrostansiyası yaxınlığında düşürərək ərazidən uzaqlaşdığı iddia olunur.
Şikayətçi hadisə ilə bağlı Nizami Rayon Polis İdarəsinin 23-cü Polis Bölməsinə müraciət etdiyini bildirib.
Məsələ ilə bağlı Azərbaycan Yerüstü Nəqliyyat Agentliyindən (AYNA) bildirilib ki, araşdırmalar nəticəsində sözügedən taksi sürücüsünün və nəqliyyat vasitəsinin taksi fəaliyyəti müvəqqəti məhdudlaşdırılıb.
Qurumdan qeyd olunub ki, taksi xidmətləri ilə bağlı daxil olan bütün müraciətlər araşdırılır və qanunvericiliyə uyğun tədbirlər görülür. AYNA sərnişinlərə qarşılaşdıqları problemlərlə bağlı "141" Çağrı Mərkəzinə və ya qurumun rəsmi sosial media hesablarına müraciət etməyi, həmçinin nəqliyyat vasitəsinin dövlət qeydiyyat nişanını təqdim etməyi tövsiyə edib.
Hazırda hadisə ilə bağlı aidiyyəti qurumlar tərəfindən araşdırmalar davam etdirilir.
