Məşhur avtomobil elan saytlarından birində gördüyü nəqliyyat vasitəsini almaq istəyən vətəndaş dələduzluqla üzləşdiyini iddia edir.
Qanuntv.az xəbər verir ki, şikayətçi Əvəz Cabbarov Baku TV-yə açıqlamasında bildirib ki, mayın 19-da internetdə yerləşdirilmiş avtomobil elanı ilə maraqlanıb.
Onun sözlərinə görə, elanda avtomobil üçün 6 500 manat ilkin ödəniş və 30 ay müddətinə aylıq 515 manat kredit ödənişi nəzərdə tutulduğu qeyd olunub. Ə.Cabbarov satıcı ilə əlaqə saxladıqdan sonra avtomobilə baxmaq üçün göstərilən ünvana yollandığını deyib.
Şikayətçi bildirib ki, avtomobilin sahibi olduğunu deyən şəxs ona nəqliyyat vasitəsinin atasının evində olduğunu söyləyib. Avtomobilə baxdıqdan sonra tərəflər arasında ilkin razılıq əldə olunub.
“Avtomobilin sahibi olduğunu deyən şəxs mənə bildirdi ki, maşın atasının qapısındadır. Gedib baxdıq, bəyəndik. Daha sonra onun atası məndən ümumilikdə 1 115 manat pul aldı. Məqsəd ilkin alqı-satqı müqaviləsi bağlamaq idi. Çünki avtomobili kreditlə almaq istəyirdim. Lakin kredit məsələsi gündəmə gələndən sonra həmin şəxslərlə əlaqə saxlaya bilmədim”, - deyə Ə.Cabbarov qeyd edib.
Onun sözlərinə görə, hazırda avtomobil etibarnamə əsasında istifadəsində olsa da, sonradan başqa bir şəxs ortaya çıxaraq nəqliyyat vasitəsinin əsl sahibinin özü olduğunu iddia edib.
“Bir nəfər ortaya çıxıb dedi ki, avtomobilin sahibi mənəm. Bildirdi ki, mənim beh verdiyim şəxsləri tanımır. Həmin şəxslərlə isə artıq heç bir əlaqə saxlamaq mümkün deyil”, - deyə şikayətçi əlavə edib.
Məsələ ilə bağlı hüquq-mühafizə orqanlarına müraciət olunub. Bildirilir ki, hazırda polis əməkdaşları tərəfindən araşdırma aparılır.
Qeyd edək ki, səsləndirilən iddialar şikayətçi tərəfin mövqeyini əks etdirir. Faktla bağlı rəsmi araşdırmanın nəticələri hələ açıqlanmayıb.
