QanunTV.az saytının rəhbəri Bəxtiyar Vəliyev Sumqayıt şəhəri Hacı Zeynalabdin qəsəbəsində yerləşən 42 saylı körpələr evi-uşaq bağçasından narazı olan bir qrup valideynlə görüş keçirərək onların şikayətlərini dinləyib.
Valideynlərin iddialarına görə, sözügedən məktəbəqədər təhsil müəssisəsində uzun müddətdir ki, ciddi problemlər hökm sürür. Bildirilir ki, bağçada nizam-intizam qaydalarına lazımi səviyyədə riayət edilmir, uşaqların təlim-tərbiyəsi və inkişafı ilə bağlı məsələlərə laqeyd münasibət göstərilir. Narazı valideynlər qeyd edirlər ki, məktəbəqədər yaş dövrü uşaqların həyatında ən həssas və vacib mərhələ hesab olunur. Məhz bu dövrdə uşaqların düzgün tərbiyə alması, sosial bacarıqlarının formalaşması və psixoloji inkişafının təmin edilməsi əsas prioritet olmalıdır.
Lakin valideynlərin sözlərinə görə, bağçada mövcud vəziyyət bu tələblərə cavab vermir. Onların iddiasına əsasən, uşaqlarla kifayət qədər məşğul olunmur, maarifləndirici və inkişafetdirici məşğələlər lazımi səviyyədə təşkil edilmir. Bu isə valideynlər arasında ciddi narahatlıq yaradıb.
Valideynlər bildirirlər ki, dəfələrlə qaldırılan problemlərə baxmayaraq, vəziyyətdə ciddi dəyişiklik müşahidə olunmayıb. Onlar hesab edirlər ki, məktəbəqədər təhsil müəssisəsində nizam-intizamın zəifləməsi, uşaqların təlim və tərbiyə prosesinə lazımi diqqətin ayrılmaması gələcəkdə daha ciddi problemlərə səbəb ola bilər.
Narazı valideynlərin fikrincə, bağça rəhbərliyi və aidiyyəti şəxslər yaranmış vəziyyətə daha məsuliyyətli yanaşmalı, valideynlərin narahatlıqlarını dinləməli və mövcud problemlərin aradan qaldırılması üçün təxirəsalınmaz tədbirlər görməlidirlər. Çünki söhbət gələcəyimiz olan uşaqların sağlam inkişafından, onların təhlükəsiz və keyfiyyətli təhsil mühitində böyüməsindən gedir.
Valideynlər aidiyyəti dövlət qurumlarına müraciət edərək, Sumqayıt şəhəri Hacı Zeynalabdin qəsəbəsi 42 saylı körpələr evi-uşaq bağçasında səsləndirilən iddiaların obyektiv şəkildə araşdırılmasını, mövcud nöqsanların aradan qaldırılmasını və məktəbəqədər təhsil müəssisəsində sağlam, şəffaf və nizamlı mühitin təmin olunmasını tələb edirlər.
Qeyd edək ki, səsləndirilən fikirlər valideynlərin iddialarını əks etdirir.
