Lənkəranda məktəbli bacı və qardaşın ölümü ilə nəticələnən yol-nəqliyyat hadisəsini törədən şəxs barəsində məhkəmə hökmü elan olunub.
Lənkəran Ağır Cinayətlər Məhkəməsində keçirilən prosesdə təqsirləndirilən Vurğun Quluzadə Azərbaycan Respublikası Cinayət Məcəlləsinin 263-1.4-cü maddəsi ilə təqsirli bilinib. Məhkəmənin hökmü ilə o, 10 il müddətinə azadlıqdan məhrum edilib.
İttihama görə, hadisə ötən il Lənkəran rayonunun Şovu kəndində baş verib. Təqsirləndirilən şəxs idarə etdiyi avtomobillə məktəbə gedən azyaşlı bacı və qardaşı vurub. Ağır xəsarət alan uşaqlar xəstəxanaya çatdırılsa da, onların həyatını xilas etmək mümkün olmayıb.
Məhkəmə araşdırması zamanı müəyyən edilib ki, sürücü yol hərəkəti qaydalarını kobud şəkildə pozub və bu pozuntu iki nəfərin ölümü ilə nəticələnib. Məhkəmə bu halları ağırlaşdırıcı vəziyyət kimi qiymətləndirərək sərt cəza təyin edib.
Qeyd edək ki, hökm hələ apellyasiya qaydasında şikayət verilənədək qüvvəyə minməyib.