Gürcüstanın Poti limanında Poti–Bakı ekspres blok-qatarının yola salınması mərasimi keçirilib.
Mərasimdə “Azərbaycan Dəmir Yolları” QSC və “Gürcüstan Dəmir Yolları” SC-nin rəhbər şəxsləri, eləcə də nəqliyyat və logistika sahəsində fəaliyyət göstərən qurumların nümayəndələri iştirak ediblər.
Bildirilib ki, yeni ekspres blok-qatar xidməti Poti limanını Azərbaycanın logistika mərkəzləri və terminalları ilə birləşdirəcək. Layihənin əsas məqsədi yükdaşımaların müddətini azaltmaq, tranzit imkanlarını genişləndirmək və Azərbaycanla Gürcüstan arasında ticarət-logistika əməkdaşlığını daha da gücləndirməkdir.
Qeyd olunub ki, blok-qatar sistemi yüklərin müəyyən olunmuş qrafik üzrə, gecikmələr olmadan daşınmasına imkan verəcək. Bu isə yük sahiblərinə terminal xərclərinə qənaət etməyə və daşımaların səmərəliliyini artırmağa şərait yaradacaq.
Yeni marşrutun Orta Dəhliz çərçivəsində regionun tranzit potensialının artmasına mühüm töhfə verəcəyi vurğulanıb.
