Sabirabad rayonunda iki nəfərin ölümü, beş nəfərin isə xəsarət alması ilə nəticələnən ağır yol-nəqliyyat hadisəsini törətməkdə təqsirli bilinən 2000-ci il təvəllüdlü Mircavad Mirqədirlinin cinayət işi üzrə məhkəmə prosesi başa çatıb.
QanunTV.az xəbər verir ki, hadisə 28 avqust 2025-ci il tarixdə, saat 13 radələrində Sabirabad–Şirvan avtomobil yolunun Sabirabad rayonunun Güdəcühür kəndi ərazisindən keçən hissəsində baş verib.
Belə ki, Rahim Əliyevin və Mircavad Mirqədirlinin idarə etdikləri “VAZ-2107” markalı avtomobillər toqquşub. Qəza nəticəsində Rahim Əliyev hadisə yerində həyatını itirib.
Müxtəlif dərəcəli bədən xəsarətləri alan Nilay Əlizadə, Mircavad Mirqədirli, Mirtalıb Talıbov, Tənzilə Əliyeva və Rəhim Əlizadə Şirvan Şəhər Mərkəzi Xəstəxanasına yerləşdiriliblər. Xəstəxanada Rahim Əliyevin nəvəsi Nilay Əlizadənin də vəfat etdiyi bildirilib.
Hadisəni törətməkdə təqsirli bilinən Mircavad Mirqədirliyə qarşı Cinayət Məcəlləsinin 263.3-cü maddəsi ilə ittiham irəli sürülüb. Təqsirləndirilən şəxs məhkəmədə verdiyi ifadəsində özünü təqsirli bilib və bildirib ki, hadisədən bir gün əvvəl toyu olub.
Onun sözlərinə görə, Şirvan şəhəri istiqamətində hərəkətdə olarkən qarşıdan gələn avtomobil yolundakı çuxurdan yayınmaq üçün onun yoluna çıxıb və məsafənin yaxın olması səbəbindən toqquşmanın qarşısını almaq məqsədilə avtomobili yolun əks istiqamətinə yönəldib. Lakin hər iki avtomobilin yenidən öz zolağına qayıtması zamanı qəza baş verib.
Məhkəmədə dindirilən zərərçəkmişlər və həlak olan şəxslərin hüquqi varisləri təqsirləndirilən şəxsə qarşı şikayətçi olmadıqlarını bildiriblər.
Lənkəran Ağır Cinayətlər Məhkəməsinin hökmü ilə Mircavad Mirqədirli 4 il 10 ay 4 gün müddətinə azadlıqdan məhrum edilib. Onun cəzasını məntəqə tipli cəzaçəkmə müəssisəsində çəkməsi qərara alınıb.
