Tibbi Ərazi Bölmələrini İdarəetmə Birliyində (TƏBİB) rəhbər heyətdə yeni kadr təyinatları həyata keçirilib.
TƏBİB-dən verilən məlumata görə, Ramil Səfər oğlu Muxtarzadə, Töhfə Ramiz qızı Cəmilova və Bahadur Məhərrəm oğlu Rzayev İcraçı direktorun müşaviri vəzifəsinə təyin olunublar.

Yeni təyin olunan şəxslər barədə

Ramil Muxtarzadə
Azərbaycan Respublikasının Prezidenti yanında Dövlət İdarəçilik Akademiyasında beynəlxalq münasibətlər ixtisası üzrə bakalavr, Bakı Dövlət Universitetində isə magistr təhsilini fərqlənmə ilə bitirib. İsveçin Kral Texnologiya İnstitutunda biznesin inkişafı üzrə mini-MBA proqramı keçib. O, müxtəlif illərdə “Nielsen Company”, “Azercell”, “TeliaSonera”, “Avirtel” və dövlət qurumlarında rəhbər vəzifələrdə çalışıb. 2023-cü ildən İcbari Tibbi Sığorta üzrə Dövlət Agentliyində Strateji inkişaf və iqtisadi təhlil departamentinə rəhbərlik edib.

Töhfə Cəmilova
Azərbaycan Tibb Universitetində həkim-oftalmoloq ixtisası üzrə, daha sonra Azərbaycan Dövlət İqtisad Universitetində iqtisadçı ixtisası üzrə təhsil alıb. 2023-cü ildə London Universitetinin İctimai səhiyyə üzrə magistr dərəcəsini qazanıb. O, Səhiyyə Nazirliyinin İctimai Səhiyyə və İslahatlar Mərkəzində uzun illər müxtəlif rəhbər vəzifələrdə çalışıb.

Bahadur Rzayev
Azərbaycan Dövlət İdarəçilik Akademiyasında menecment üzrə bakalavr, İstanbul Universitetində magistr təhsili alıb. Almaniyanın RWTH Aachen Universitetində elmi tədqiqat aparıb, Böyük Britaniyanın Birmingem Universitetində səhiyyə siyasəti və idarəetməsi üzrə ikinci magistr dərəcəsini fərqlənmə ilə tamamlayıb. O, müxtəlif dövlət qurumlarında rəhbər və müşavir vəzifələrində çalışıb, həmçinin “Yüksəliş” müsabiqəsinin finalçısı olub.

Qeyd edək ki, yeni təyinatlar TƏBİB-in idarəetmə strukturunun gücləndirilməsi və səhiyyə sistemində islahatların davam etdirilməsi məqsədi daşıyır.