8 may 2026-cı il tarixində müasir müstəqil Azərbaycanın memarı və qurucusu, xalqımızın ümummilli lideri Heydər Əliyevin anadan olmasının 103-cü ildönümü münasibətilə SOCAR-da geniş tədbir təşkil olunub.
Tədbir çərçivəsində əvvəlcə SOCAR-ın Baş ofisində ulu öndərin büstü önünə gül dəstələri düzülüb, dahi şəxsiyyətin əziz xatirəsi dərin ehtiramla yad edilib. Daha sonra tədbir Azərbaycan Respublikasının Dövlət Himninin səsləndirilməsi ilə başlanıb.
Tədbirdə çıxış edən SOCAR-ın prezidenti Rövşən Nəcəf bildirib ki, ulu öndər Heydər Əliyev Azərbaycanın ən mürəkkəb və taleyüklü dövrlərində ölkəni böyük təhlükələrdən xilas edərək dövlət müstəqilliyini möhkəmləndirib, müasir və güclü Azərbaycanın formalaşmasının əsasını qoyub. O vurğulayıb ki, ümummilli liderin müəyyən etdiyi inkişaf strategiyası ölkəmizin siyasi, iqtisadi və sosial sahələrdə davamlı tərəqqisini təmin edib.
SOCAR prezidenti çıxışında ulu öndərin müəllifi olduğu milli enerji strategiyasının Azərbaycanın inkişafında mühüm rol oynadığını xüsusi qeyd edib. Bildirib ki, “Əsrin müqaviləsi” ilə təməli qoyulan enerji siyasəti ölkəmizin beynəlxalq nüfuzunu artırmaqla yanaşı, Azərbaycanın dünya enerji bazarında etibarlı tərəfdaş kimi mövqeyini daha da gücləndirib.
Rövşən Nəcəf qeyd edib ki, ulu öndərin siyasi kursu bu gün Prezident İlham Əliyev tərəfindən uğurla davam etdirilir. Onun sözlərinə görə, dövlət başçısının rəhbərliyi ilə Azərbaycan öz tarixinin ən mühüm uğurlarına imza ataraq regionda sabitlik, əməkdaşlıq və inkişafın əsas aparıcı qüvvələrindən birinə çevrilib.
Tədbirdə çıxış edən görkəmli neftçi və qazmaçı İsrafil Hüseynovun qızı Gülnarə Hüseynova ulu öndərin neftçilərə və onların ailələrinə göstərdiyi diqqət və qayğıdan danışaraq, atasının Heydər Əliyevlə bağlı xatirələrini iştirakçılarla bölüşüb.
“SOCAR Upstream Operations Management” şirkətində İstismar əməliyyatları üzrə qrup rəhbəri Elmir Qocayev isə çıxışında ulu öndərin əsasını qoyduğu gənclər siyasətinin bu gün də uğurla davam etdirildiyini bildirib. O qeyd edib ki, Prezident İlham Əliyevin rəhbərliyi ilə Azərbaycanda gənclərin inkişafı, təhsili və peşəkar formalaşması istiqamətində mühüm layihələr həyata keçirilir.
Tədbir çərçivəsində ulu öndər Heydər Əliyevin həyat və fəaliyyətinə, eləcə də Azərbaycanın neft sənayesinin inkişafındakı xidmətlərinə həsr olunmuş videoçarx nümayiş etdirilib. Videoçarx müxtəlif müsabiqələrin qalibi İsmayıl Zülfüqarovun tarda ifası ilə təqdim olunub.
Daha sonra tədbir konsert proqramı ilə davam edib. “Ritm” rəqs qrupunun təqdim etdiyi milli rəqs nümunələri iştirakçılar tərəfindən maraqla qarşılanıb. Azərbaycan Respublikasının Xalq artisti Samir Cəfərov isə ulu öndərin sevdiyi və Vətən sevgisini tərənnüm edən musiqi nömrələrini səsləndirib.
Tədbir boyunca ümummilli lider Heydər Əliyevin zəngin dövlətçilik irsi, Azərbaycanın inkişafı naminə gördüyü tarixi xidmətlər və ölkənin enerji təhlükəsizliyinin təmin edilməsində həyata keçirdiyi mühüm strategiyalar xüsusi vurğulanıb.
