Bu gün Azərbaycandan Ermənistana 8 vaqon, ümumilikdə 479 ton dizel yanacağı göndərilib.
Məlumatı Azərbaycan Dəmir Yolları QSC “Report”a açıqlayıb. Bildirilib ki, tədarük dəmir yolu vasitəsilə həyata keçirilib.

Eyni zamanda, Rusiyadan Ermənistana yüklərin Azərbaycandan tranzit keçməklə daşınması da davam etdirilib. Belə ki, 6 vaqondan ibarət, ümumi çəkisi 402 ton olan gübrə Biləcəri stansiyasından Böyük Kəsik stansiyası istiqamətinə göndərilib.

Qeyd olunub ki, indiyədək Azərbaycandan Ermənistana 8500 tondan çox dizel, 979 ton Aİ-92 və 2955 ton Aİ-95 markalı benzin ixrac edilib.

Həmçinin Rusiyadan Ermənistana Azərbaycan ərazisindən tranzitlə 27 min tondan çox taxıl, 4000 ton gübrə, 133 ton alüminium və 68 ton qarabaşaq daşınıb.

Məlumata görə, bu proses regionda dəmir yolu daşımalarının davamlı şəkildə həyata keçirildiyini göstərir.