Cəlilabad rayonunda qardaşının həyat yoldaşını xüsusi amansızlıqla qətlə yetirməkdə təqsirləndirilən Təhmasib Əliyevin cinayət işi üzrə məhkəmə prosesi yekunlaşıb.

Qanuntv.az xəbər verir ki, Lənkəran Ağır Cinayətlər Məhkəməsində hakim Cavid Səfərlinin sədrliyi ilə keçirilən prosesdə təqsirləndirilən şəxsə hökm oxunub.

İttihama görə, hadisə ailə daxilində yaranmış mübahisədən sonra baş verib. Belə ki, qardaşının həyat yoldaşı Rəviyyə Nərmanova ilə aralarında yaranan münaqişədən sonra Təhmasib Əliyev qisas almaq qərarına gəlib.

Məlumata əsasən, tərəflər arasında həyətyanı sahədə aparılan tikinti işləri zamanı yaranan mübahisə sonradan daha da gərginləşib. Təqsirləndirilən şəxs hadisə günü spirtli içki qəbul etdikdən sonra gecə saatlarında qadını öldürmək niyyəti ilə onun yaşadığı evə daxil olub.

İstintaq materiallarına görə, o, gecə saatlarında yataq otağına pəncərədən girərək Rəviyyə Nərmanovaya bıçaqla çoxsaylı zərbələr endirib. Məhkəmə-tibb ekspertizasının rəyinə əsasən, zərərçəkmiş şəxsin bədənində ümumilikdə 74 bıçaq xəsarəti aşkarlanıb.

Məhkəmə zamanı Təhmasib Əliyev özünü təqsirli bildiyini və törətdiyi əməldən peşman olduğunu deyib. O, hadisədən əvvəl baş verən mübahisə zamanı təhqir olunduğunu iddia edib və əsəbi vəziyyətdə cinayəti törətdiyini bildirib.

Zərərçəkmiş şəxsin hüquqi varisi qismində ifadə verən mərhumun bacısı isə hadisədən əvvəl təqsirləndirilən şəxsin bacısını ölümlə hədələdiyini məhkəmənin diqqətinə çatdırıb. O, həmçinin qətlin yalnız bir nəfər tərəfindən törədildiyinə dair şübhələrinin olduğunu da bildirib.

Məhkəmənin hökmü ilə Təhmasib Əliyev xüsusi amansızlıqla qəsdən adam öldürməkdə təqsirli bilinərək 18 il 6 ay müddətinə azadlıqdan məhrum edilib.