Tovuz rayonunda 1961-ci il təvəllüdlü Məhəbbət İsayevanın qətlə yetirilməsi ilə bağlı hadisənin təfərrüatları məlum olub.
Qanuntv.az xəbər verir ki, hadisə avqustun 6-da rayonun Əli Mərdanlı kəndi ərazisində yerləşən ailə-fermer təsərrüfatında baş verib.
Tovuz Rayon Prokurorluğuna daxil olan məlumata əsasən, hadisə ilə bağlı ilkin araşdırmalar zamanı 1997-ci il təvəllüdlü Ülvi İsayevin şəxsi münasibətlər zəminində yaranmış mübahisə zamanı qohumu Məhəbbət İsayevaya odun parçası ilə xəsarətlər yetirərək onu qəsdən öldürməsinə əsaslı şübhələr müəyyən edilib.
Məlumata görə, ailə təsərrüfatını Ülvi İsayev, onun atası Azər İsayev və bibisi Məhəbbət İsayev birlikdə idarə ediblər. Onların təsərrüfat ərazisində yerləşən evlərdə yaşadıqları bildirilir.
Hadisə günü günorta saatlarında Azər İsayev bacısı Məhəbbətlə təsərrüfatla bağlı söhbət edərkən Ülvi İsayev onların yanına gəlib. İlkin məlumatlara görə, Ülvi İsayev əlindəki odun parçası ilə Məhəbbət İsayevanın başının arxa nahiyəsinə zərbə endirib.
Qadın aldığı xəsarətlər nəticəsində hadisə yerində ölüb.
Məhəbbət İsayevanın öldüyünü görən Azər İsayev hadisə barədə özü polisə məlumat verərək hüquq-mühafizə orqanlarının əməkdaşlarını hadisə yerinə çağırıb.
Polis əməkdaşlarının keçirdikləri tədbirlər nəticəsində hadisəni törətməkdə şübhəli bilinən Ülvi İsayev saxlanılıb.
İlkin araşdırmalar zamanı Ülvi İsayevin Vətən müharibəsi iştirakçısı olduğu və müharibə zamanı psixoloji sarsıntı keçirdiyi, bununla əlaqədar bir neçə dəfə müalicə aldığı barədə məlumatlar da yayılıb. Bu məlumatların hadisənin hüquqi qiymətləndirilməsinə təsiri istintaq çərçivəsində araşdırılır.
Faktla bağlı Tovuz Rayon Prokurorluğunda Azərbaycan Respublikası Cinayət Məcəlləsinin 120.1-ci maddəsi (qəsdən adam öldürmə) ilə cinayət işi başlanıb. Ülvi İsayev iş üzrə şübhəli şəxs qismində tutulub.
Hazırda cinayət işi üzrə ibtidai istintaq davam etdirilir. Hadisənin bütün təfərrüatlarının, mübahisənin səbəblərinin və digər halların araşdırılması istiqamətində istintaq hərəkətləri aparılır.
Qeyd: Ülvi İsayevin təqsiri məhkəmənin qanuni qüvvəyə minmiş hökmü ilə təsdiqlənənədək o, təqsirsiz hesab olunur.
