Türkiyə və Ermənistan 1 yanvar 2026-cı il tarixindən etibarən diplomatik, xüsusi və xidməti pasport sahibləri üçün viza prosedurlarının asanlaşdırılması barədə qərar qəbul ediblər.
Qanuntv.az xəbər verir ki, bu barədə Ankara və İrəvan rəsmi açıqlamalar yayıb. Türkiyə Xarici İşlər Nazirliyinin məlumatına görə, qərar iki ölkə arasında normallaşma prosesi üzrə xüsusi nümayəndələr arasında əldə olunmuş razılaşma çərçivəsində qəbul edilib. Ermənistan Xarici İşlər Nazirliyi də analoji mövqeni təsdiqləyib.
Qərar fonunda Türkiyə–Ermənistan sərhədində müşahidə olunan proseslər diqqət çəkir. Məlumatlara əsasən, sərhəddə yerləşən Əlican keçid məntəqəsində yenidənqurma və infrastruktur işləri aparılır. İğdırın yerli media orqanları yazır ki, keçid məntəqəsinin yanvar ayında açılması planlaşdırılır və bu səbəbdən işlər sürətləndirilib.
Bildirilib ki, Əlican keçid məntəqəsində aparılan işlərə birbaşa İğdır valisi Ercan Turan nəzarət edir. Vali ötən həftə keçid məntəqəsinə baş çəkərək görülən işlərlə yerində tanış olub.
İğdır yerli mediasında yayılan məlumatlarda vurğulanır ki, Türkiyə–Ermənistan sərhədinin açılması halında sərnişin və nəqliyyat vasitələrinin hərəkətində ciddi artım gözlənilir və mövcud yol infrastrukturu bu yükü qarşılamaq üçün yetərli deyil. “Yeşildır” qəzeti yazır ki, Əlican sərhəd keçid məntəqəsində nəqliyyat və infrastruktur problemlərinin həlli vacib məsələlər sırasındadır. Qeyd olunur ki, keçid məntəqəsi avqust ayına qədər sərnişin daşımaları üçün açıla bilər.
Xatırladaq ki, Türkiyə Ermənistanın Azərbaycan torpaqlarını işğal etməsi səbəbindən sərhədi bağlamışdı. Son dövrlər Bakı–İrəvan xəttində sülh danışıqlarının irəliləməsi fonunda sərhədin açılması məsələsi yenidən gündəmə gəlib.
Türkiyə Prezidenti Rəcəb Tayyip Ərdoğan da bu yaxınlarda çıxışında bildirib ki, Ankara gələn il Ermənistanla münasibətlərin normallaşdırılması prosesində “simvolik addımlar” atmağı planlaşdırır. Onun sözlərinə görə, bu proses Azərbaycanla aparılan dialoq çərçivəsində həyata keçirilir.
Ermənistanın baş naziri Nikol Paşinyan da öz növbəsində normallaşma istiqamətində belə addımların atılacağına ümid etdiklərini bəyan edib.
