1993-cü ilin iyun ayı Azərbaycan tarixinin ən mürəkkəb və taleyüklü dövrlərindən biri kimi yadda qalıb. Ölkədə siyasi böhran dərinləşmiş, vətəndaş qarşıdurması təhlükəsi yaranmış, dövlətçiliyin gələcəyi ciddi sınaq qarşısında qalmışdı.
Belə bir ağır vaxtda xalqın tələbi ilə hakimiyyətə qayıdan ümummilli lider Heydər Əliyev Azərbaycanın parçalanma və xaos təhlükəsindən çıxarılması, sabitliyin təmin olunması və güclü dövlət quruculuğunun əsaslarının yaradılması istiqamətində mühüm addımlar atdı. Məhz bu tarixi hadisə səbəbindən 15 İyun Azərbaycan tarixində Milli Qurtuluş Günü kimi qeyd edilir.
Heydər Əliyevin siyasi fəaliyyəti yalnız ölkədaxili sabitliyin bərpası ilə məhdudlaşmadı. Onun rəhbərliyi dövründə Azərbaycanın beynəlxalq əlaqələri genişləndi, xarici siyasətdə mühüm uğurlar əldə olundu və xüsusilə Türkiyə ilə strateji tərəfdaşlıq münasibətlərinin təməli daha da möhkəmləndi.
Milli Qurtuluş Gününün ildönümü ərəfəsində Türkiyə Böyük Millət Məclisinin Türkiyə-Azərbaycan parlamentlərarası dostluq qrupunun rəhbəri, millət vəkili Şamil Ayrım Heydər Əliyevlə bağlı xatirələrini və 15 iyun hadisələrinin Türkiyədə necə qarşılandığını bölüşüb.
Şamil Ayrım bildirib ki, Heydər Əliyevlə ilk görüşü 1995-ci ildə onun Türkiyə Böyük Millət Məclisinə səfəri zamanı baş tutub. O, ümummilli liderlə sonrakı görüşlərindən, Naxçıvanda Hüseyn Cavidin məqbərəsinin açılışı zamanı yaşanan xatirələrdən danışıb.
Millət vəkili qeyd edib ki, həmin dövrdə Azərbaycanda vəziyyət olduqca mürəkkəb idi:
“Ölkədə daxili qarışıqlıq, iqtisadi çətinliklər və idarəetmədə problemlər var idi. Heydər Əliyev hakimiyyətə qayıtdıqdan sonra ilk növbədə ölkənin daxili problemlərinin həllinə başladı, sabitlik yaratdı və Azərbaycanın inkişaf yolunun əsasını qoydu”.
Şamil Ayrım 1994-cü ildə imzalanan “Əsrin müqaviləsi”nin Azərbaycanın iqtisadi inkişafında mühüm dönüş nöqtəsi olduğunu vurğulayıb. Onun sözlərinə görə, bu addım ölkənin dünya iqtisadi sisteminə inteqrasiyasına böyük imkan yaratdı.
Türkiyə-Azərbaycan münasibətlərindən danışan millət vəkili bildirib ki, Heydər Əliyev iki ölkə arasındakı qardaşlıq bağlarının möhkəmlənməsində böyük rol oynayıb.
“Heydər Əliyev deyirdi ki, Türkiyə ilə Azərbaycan elə möhkəm bağlanmalıdır ki, bizi heç kim ayıra bilməsin. Bu gün həmin sarsılmaz əlaqələrin şahidiyik”, – deyə Şamil Ayrım qeyd edib.
Qeyd edək ki, 15 İyun – Milli Qurtuluş Günü Azərbaycanın müasir tarixində dövlətçilik ənənələrinin qorunması, sabitliyin bərpası və inkişaf strategiyasının formalaşması ilə bağlı mühüm tarixi gün kimi qeyd olunur.
QanunTV.az
