Quba rayon Mənzil Təsərrüfatı İstehsalat Birliyinin fəaliyyəti ilə bağlı sakinlərin narazılığı davam edir. QanunTV.az-a daxil olan müraciətlərdə qurumun üzərinə düşən vəzifələrin icrası, yaşayış binalarına və ümumi ərazilərə göstərilən xidmətlərin səviyyəsi ilə bağlı ciddi iradlar səsləndirilir.
Sakinlərin bildirdiyinə görə, mənzil təsərrüfatı sahəsində mövcud problemlərin həlli, ərazilərin abad saxlanılması, təmizlik işlərinin təşkili və vətəndaş müraciətlərinə münasibət məsələlərində daha məsuliyyətli yanaşma tələb olunur.
Vətəndaşlar hesab edirlər ki, belə bir qurumun əsas fəaliyyəti insanların rahat və təhlükəsiz yaşayış şəraitinin təmin olunmasına xidmət etməlidir. Lakin onların fikrincə, bəzi məsələlərdə nəzarətin və operativliyin kifayət qədər olmaması narazılıqlara səbəb olur.
Sakinlərin sualı isə budur: Əgər mənzil təsərrüfatı əhalinin gündəlik ehtiyaclarına cavab vermək üçün fəaliyyət göstərirsə, niyə bəzi problemlərin həlli uzun müddət tələb edir?
Vətəndaşlar aidiyyəti şəxslərdən görülən işlərə yenidən baxılmasını, mövcud çatışmazlıqların aradan qaldırılmasını və xidmət səviyyəsinin artırılmasını gözləyirlər.
QanunTV.az olaraq bildiririk ki, məqsəd hər hansı qurumu əsassız şəkildə ittiham etmək deyil. Sakinlərin səsləndirdiyi fikirləri ictimaiyyətə çatdırmaq və problemlərin həllinə diqqət yönəltməkdir.
Məsələ ilə bağlı Quba rayon Mənzil Təsərrüfatı İstehsalat Birliyinin rəhbərliyinin, o cümlədən Dəyanət bəyin mövqeyini dərc etməyə hazırıq.
