Türkiyənin 32 vilayətində qanunsuz mərc oyunlarının təşkilinə qarşı genişmiqyaslı əməliyyat keçirilib.
Qanuntv.az xəbər verir ki, əməliyyat nəticəsində 116 şübhəli şəxs saxlanılıb.
Məlumata görə, araşdırmalar zamanı şübhəlilərin idarə etdiyi qanunsuz mərc saytlarında son 10 il ərzində tranzaksiya həcminin təxminən 40 milyard lirəyə çatdığı müəyyən edilib.
Bildirilib ki, "Qanunsuz mərc oyunlarının təşkili" və "cinayət törətmək məqsədilə mütəşəkkil cinayətkar dəstə yaratmaq və ona üzv olmaq" maddələri üzrə 18 ay ərzində texniki və fiziki müşahidə tədbirləri həyata keçirilib.
Araşdırmalar nəticəsində 2016-2026-cı illər ərzində internet üzərindən qanunsuz mərc oyunlarının təşkilinə şərait yaradan iki mərc saytı müəyyən olunub. Həmin platformalar vasitəsilə fəaliyyət göstərən şəxslərin cinayətkar şəbəkə yaratdıqları və qanunsuz fəaliyyətlə məşğul olduqları üzə çıxıb.
Toplanmış sübutlar əsasında 32 vilayətdə 140 şübhəlinin saxlanılması üçün eyni vaxtda əməliyyat keçirilib. Nəticədə 116 nəfər saxlanılıb.
Məlumata görə, 12 şübhəli şəxsin xaricdə olduğu, daha 12 nəfərin saxlanılması üçün axtarış tədbirlərinin davam etdiyi bildirilib.
Aparılan axtarışlar zamanı çoxsaylı rəqəmsal avadanlıqlar, həmçinin cinayət yolu ilə əldə edildiyi ehtimal olunan külli miqdarda pul vəsaiti aşkarlanaraq müsadirə olunub.
