Azərbaycan ilə Türkiyə arasında qardaşlıq və strateji müttəfiqlik münasibətlərinin ən mühüm sənədlərindən biri hesab olunan Şuşa Bəyannaməsinin imzalanmasından 5 il ötür.
2021-ci il iyunun 15-də Azərbaycanın mədəniyyət paytaxtı Şuşa şəhərində Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğan tərəfindən imzalanan bu sənəd iki qardaş ölkə arasındakı münasibətləri yeni mərhələyə yüksəltdi.
“Azərbaycan Respublikası ilə Türkiyə Respublikası arasında müttəfiqlik münasibətləri haqqında” Şuşa Bəyannaməsi 2022-ci ildə Azərbaycan Milli Məclisi və Türkiyə Böyük Millət Məclisi tərəfindən təsdiqlənərək qüvvəyə mindi.
Bəyannamə Azərbaycan və Türkiyə arasında siyasi, hərbi, iqtisadi, enerji, nəqliyyat, humanitar və digər sahələrdə əməkdaşlığın daha da genişləndirilməsini nəzərdə tutur.
Sənəddə iki ölkənin müstəqillik, suverenlik, ərazi bütövlüyü və beynəlxalq səviyyədə tanınmış sərhədlərinin toxunulmazlığı prinsiplərinə sadiqliyi xüsusi vurğulanır.
Şuşa Bəyannaməsi həmçinin 44 günlük Vətən müharibəsi zamanı Azərbaycanın əldə etdiyi tarixi Qələbəyə və Türkiyənin göstərdiyi mənəvi-siyasi dəstəyə diqqət çəkir. Sənəddə regionda sülhün, sabitliyin və təhlükəsizliyin təmin olunması istiqamətində birgə fəaliyyətin vacibliyi qeyd olunur.
Bəyannamədə müdafiə və təhlükəsizlik sahəsində əməkdaşlığın gücləndirilməsi, hərbi təlimlərin keçirilməsi, müdafiə sənayesi üzrə birgə layihələrin həyata keçirilməsi və iki ölkənin silahlı qüvvələrinin imkanlarının artırılması istiqamətində razılaşmalar əksini tapıb.
Sənəddə eyni zamanda enerji və nəqliyyat layihələrinin inkişafı, xüsusilə Cənub Qaz Dəhlizinin əhəmiyyəti, Şərq-Qərb nəqliyyat dəhlizinin imkanlarının genişləndirilməsi və Azərbaycanı Naxçıvanla birləşdirəcək Zəngəzur dəhlizinin regional əlaqələrə töhfəsi vurğulanır.
Şuşa Bəyannaməsi Azərbaycan-Türkiyə münasibətlərinin “Bir millət, iki dövlət” prinsipi əsasında daha da möhkəmləndiyini göstərən mühüm siyasi sənəd kimi qiymətləndirilir.
Bu tarixi sənəd iki ölkə arasında yalnız dövlətlərarası əlaqələri deyil, eyni zamanda xalqlar arasındakı qardaşlıq və həmrəyliyi daha da gücləndirən mühüm addım oldu.
QanunTV.az
