Quba rayon İbrahim Hümbətov adına Vladimirovka kənd tam orta ümumi təhsil məktəbinin direktoru Gülnarə Hüseynovanın fəaliyyəti ilə bağlı bəzi valideynlər tərəfindən narazılıqlar səsləndirilir.
Valideynlərin QanunTV.az-a müraciətində bildirilir ki, onların əsas narazılığı məktəb rəhbərliyinin idarəçilik fəaliyyəti və təhsil prosesinə yanaşması ilə bağlıdır. Onların sözlərinə görə, məktəbdə dərslərin keyfiyyəti, şagirdlərin nəticələri və ümumi tədris mühitinin daha da yaxşılaşdırılması istiqamətində rəhbərlik tərəfindən daha ciddi addımların atılmasına ehtiyac var.
Valideynlər qeyd edirlər ki, məktəb direktoru təhsil ocağında nizam-intizamın, keyfiyyətli tədrisin və sağlam təhsil mühitinin formalaşmasında əsas məsul şəxslərdən biridir. Onların fikrincə, rəhbərlik tərəfindən müəllimlərin fəaliyyətinə nəzarət, dərslərin səmərəli təşkili və şagirdlərin bilik səviyyəsinin artırılması istiqamətində daha diqqətli yanaşma göstərilməlidir.
Müraciətdə vurğulanır ki, valideynlər övladlarının daha keyfiyyətli təhsil almasını, məktəbdə müasir təhsil tələblərinə uyğun idarəçilik və şəffaf yanaşmanın təmin olunmasını istəyirlər. Onların fikrincə, təhsil müəssisəsində mövcud olan problemlər vaxtında araşdırılmalı və aradan qaldırılması üçün zəruri tədbirlər görülməlidir.
QanunTV.az olaraq bildiririk ki, təhsil sahəsində səslənən hər bir müraciət diqqətlə araşdırılmalı, həm valideynlərin, həm də məktəb rəhbərliyinin mövqeyi nəzərə alınmalıdır. Məqsəd hər hansı şəxsi hədəf göstərmək deyil, mövcud iddiaları ictimaiyyətə çatdırmaq və məsələnin aydınlaşdırılmasına şərait yaratmaqdır.
Məsələ ilə bağlı Quba rayon İbrahim Hümbətov adına Vladimirovka kənd tam orta ümumi təhsil məktəbinin direktoru Gülnarə Hüseynovanın və aidiyyəti qurumların mövqeyini dərc etməyə hazırıq.
