Azərbaycan Respublikasının Prezidenti İlham Əliyev iyunun 16-da Müqəddəs Taxt-Tacın Dinlərarası Dialoq üzrə Dikasteriyasının prefekti Corc Ceykob Kuvakadı qəbul edib.
Qanuntv.az xəbər verir ki, görüş zamanı Azərbaycan ilə Müqəddəs Taxt-Tac arasında münasibətlərin uğurla inkişaf etdiyi vurğulanıb, qarşılıqlı səfərlərin ikitərəfli əlaqələrin möhkəmlənməsində mühüm rol oynadığı qeyd olunub.
Söhbət əsnasında Corc Ceykob Kuvakadın ölkəmizin regionlarına səfərinin əhəmiyyəti də diqqətə çatdırılıb.
Müqəddəs Taxt-Tac rəsmisi qəbula və göstərilən qonaqpərvərliyə görə minnətdarlığını bildirərək Roma Papası XIV Leonun və Vatikanın dövlət katibi kardinal Pietro Parolinin salamlarını dövlət başçısına çatdırıb. Prezident İlham Əliyev isə öz salamlarını Roma Papasına və Vatikan rəsmilərinə çatdırmağı xahiş edib.
Görüşdə Prezident İlham Əliyev Vatikana səfərini, mərhum Roma Papası Fransisklə görüşünü, eləcə də onun Azərbaycana səfərini məmnunluqla xatırlayıb.
Tərəflər Azərbaycanı tarixən müxtəlif dinlərin və xalqların sülh və qarşılıqlı hörmət şəraitində yaşadığı tolerant məkan kimi dəyərləndiriblər. Ölkəmizin multikulturalizm və dinlərarası dialoqa verdiyi töhfələrin beynəlxalq səviyyədə əhəmiyyəti vurğulanıb.
Həmçinin Müqəddəs Taxt-Tacın Azərbaycandakı Katolik Kilsəsinin fəaliyyəti və ölkəmizdə ikinci katolik kilsəsinin inşası qeyd olunub.
Heydər Əliyev Fondu ilə Müqəddəs Taxt-Tac arasında əməkdaşlıq, Fondun Vatikanda həyata keçirdiyi layihələrin mədəni irsin qorunması və dinlərarası dialoqun təşviqində rolu da diqqətə çatdırılıb.
Sonda Azərbaycan ilə Müqəddəs Taxt-Tac arasında əməkdaşlığın perspektivləri və qarşılıqlı maraq doğuran məsələlər müzakirə edilib. Prezident İlham Əliyev Roma Papası XIV Leonun ölkəmizə səfərə dəvəti ilə bağlı məktubu Corc Ceykob Kuvakada təqdim edib.
Qanuntv.az
