Bakı Ağır Cinayətlər Məhkəməsində oğurluq və dələduzluq əməllərində ittiham edilən 1995-ci il təvəllüdlü Ayaz İsgəndərova hökm oxunub.
Qanuntv.az xəbər verir ki, o kibercinayətkarlıq yolu ilə bir neçə vətəndaşa məxsus bank kartlarından külli miqdarda pul vəsaiti oğurlamaqda təqsirli bilinib.

İttihama əsasən, A. İsgəndərov xaricdə yaşayan “Petroviç” soyadlı şəxslə cinayətkar əlaqəyə girərək Azərbaycanda onun üçün “m10” elektron pul kisələri yaradıb və hər birini 300 manata satıb. Kuryer işləyən Ayaz aldığı tapşırıqlar əsasında sosial şəbəkələrdə “ABB-dən payız sürprizi” və digər bu kimi saxta məzmunlu elanlar yerləşdirib.

Saxta səhifələrdə yerləşdirilən elanlara inanan vətəndaşlar guya güzəştlərdən yararlanmaq üçün təqdim olunan linklərə daxil olaraq qeydiyyatdan keçib, anket məlumatlarını, bank kartlarının 16 rəqəmli nömrəsini və “OTP” təhlükəsizlik şifrəsini müvafiq xanalara daxil ediblər.

İstintaqla müəyyən edilib ki, A. İsgəndərov və digər şəxslər xüsusi informasiya proqramlarından istifadə edərək əldə olunan məxfi məlumatlar vasitəsilə zərərçəkənlərin bank hesablarındakı vəsaitləri ələ keçiriblər.

Zərərçəkənlər arasında Azərbaycanın Milli Qəhrəmanı Hökümə Əliyevanın atası Cəlil Alıyev də olub.
Təqsirləndirilən şəxs və əlbir olduğu digər şəxslərin Cəlil Alıyevə məxsus bank hesabından 80 min manatdan artıq vəsaiti mənimsədiyi müəyyənləşib.

Daxili İşlər Nazirliyinin Kibercinayətkarlıqla Mübarizə Baş İdarəsinin əməkdaşları tərəfindən keçirilən əməliyyat tədbirləri nəticəsində A. İsgəndərov saxlanılıb və barəsində cinayət işi başlanıb.

Məhkəmənin hökmü ilə o, Cinayət Məcəlləsinin 177.2.1, 177.2.3-1, 177.2.4 və 178.3.2-ci maddələri üzrə təqsirli bilinərək 8 il 6 ay müddətinə azadlıqdan məhrum edilib.