Lənkəran rayonunda ağır yol-nəqliyyat hadisəsi baş verib, ölən və yaralanan var.

Qanuntv.az xəbər verir ki, hadisə Lənkəran–Boradigah yolunun Separadi kəndi ərazisində qeydə alınıb.

Məlumata görə, Masallı rayonunun Mahmudavar kəndi sakini Sultan İlkin oğlu Hacıyev idarə etdiyi "Hyundai" markalı avtomobillə hərəkətdə olarkən idarəetməni itirib. Nəticədə avtomobil əvvəlcə yol kənarındakı rabitə dirəyinə, daha sonra körpünün dəmir konstruksiyasına çırpılıb. Daha sonra nəqliyyat vasitəsi təxminən 20 metr hündürlükdən çaya düşüb.

Qəza nəticəsində sürücü Sultan Hacıyev və sərnişin – Masallı rayonunun Mahmudavar kənd sakini, 25 yaşlı Ümid Nicat oğlu Möhübbətov müxtəlif dərəcəli bədən xəsarətləri alıblar. Ətrafdakı insanların köməyi ilə onlar sudan çıxarılaraq təcili tibbi yardım vasitəsilə Lənkəran Rayon Mərkəzi Xəstəxanasına çatdırılıblar.

Lakin Ümid Möhübbətov aldığı ağır xəsarətlər səbəbindən xəstəxanada dünyasını dəyişib. Sürücünün vəziyyətinin isə ağır olduğu bildirilir.
Faktla bağlı araşdırma aparılır.