Mayın 21-də Heydər Əliyev Mərkəzində perulu rəssam Ronald Kompanokanın “Yuxular teatrı” (“The Theater of Dreams”) adlı fərdi sərgisinin açılış mərasimi keçirilib.

Tədbirdə Leyla Əliyeva, Alyona Əliyeva, mədəniyyət naziri Adil Kərimli, incəsənət nümayəndələri və digər qonaqlar iştirak ediblər.

Sərgidə müəllifin bir sıra əsərləri ilk dəfə ictimaiyyətə təqdim olunub. Açılışdan əvvəl jurnalistlərə açıqlama verən Ronald Kompanoka bu layihənin onun üçün xüsusi əhəmiyyət daşıdığını bildirib. Rəssam qeyd edib ki, sərgini fərqləndirən əsas məqam müxtəlif mədəni yanaşmaların və yaradıcı baxışların bir araya gətirilməsidir.

Onun sözlərinə görə, təqdim olunan bəzi əsərlər Azərbaycan mədəniyyətindən ilhamlanaraq hazırlanıb. Əsərlərdə xalça elementləri, milli motivlər və Azərbaycanla bağlı obrazlar əks olunub. Ronald Kompanoka yaradıcılığında fantaziya və sehrli sürrealizm elementlərinin üstünlük təşkil etdiyini, əsərlərini isə realist və mistik üslubun sintezi kimi qiymətləndirdiyini deyib.

Tədbirdə çıxış edən Anar Ələkbərov bildirib ki, sərginin Azərbaycanda keçirilməsi ilə bağlı bir neçə ildir müzakirələr aparılırdı və layihənin həyata keçirilməsi nəhayət mümkün olub. O, həmçinin bu kimi mədəni layihələrə göstərdiyi dəstəyə görə Azərbaycanın Birinci vitse-prezidenti Mehriban Əliyevaya minnətdarlığını ifadə edib.

Qeyd olunub ki, sərginin əsas mövzularını zaman, yuxular və səyahət təşkil edir. Ekspozisiyada saatlar, sehrli gəmilər, Ay işığında hərəkət edən karvanlar və fantastik obrazlar xüsusi yer tutur.

Tədbir çərçivəsində rəssamın əsərlərindəki personajları canlandıran bədii proqram da nümayiş olunub. Daha sonra qonaqlar sərgi ilə yaxından tanış olublar.

Məlumata görə, Ronald Kompanokanın əsərləri daha əvvəl Avropa, ABŞ və Mərkəzi Amerikanın müxtəlif ölkələrində nümayiş etdirilib.

Sərgi 2027-ci il martın 1-dək davam edəcək.