Muzeyin direktoru Əminə Məlikova çıxışında bildirib ki, sərgidə rəssamın son beş ildə yaratdığı 28 əsər nümayiş olunur. Onun sözlərinə görə, ekspozisiyanın mühüm hissəsini rəssamın eskizləri əsasında toxunan beş yeni xalça təşkil edir. Bu əsərlər müasir obrazın tekstil sənətində ifadə imkanlarını nümayiş etdirərək ənənəvi sənətlə çağdaş incəsənət arasında yaradıcı dialoq formalaşdırır.

Qeyd olunub ki, sərgi çərçivəsində “Analar üçün çiçəklər” əsərinin rəngkarlıq, xalça, vitraj və rəqəmsal interpretasiya olmaqla dörd fərqli təcəssümü muzeyin daimi kolleksiyasına daxil ediləcək.

Direktor əlavə edib ki, layihədə eyni obrazın müxtəlif formalarda inkişafı xüsusi konsept kimi təqdim olunur: obraz rəngkarlıqdan rəqəmsal müstəviyə, daha sonra vitraj, mozaika və xalça kimi materiallarda yeni məna qazanır və transformasiya olunaraq davamlı həyat qazanır.

Ekspozisiyanın ümumi ritmini fəsillərin dəyişməsi, gül kompozisiyaları, qadın və kişi portretləri, Bakı mənzərələri və abstrakt formalar müəyyən edir. Sərgidə həmçinin xalça toxuma prosesinin səslərindən hazırlanmış xüsusi audio-instalyasiya da təqdim olunur.

Mədəniyyət nazirinin müavini Səadət Yusifova bildirib ki, sərgi müəllifin güclü yaradıcı potensialını əks etdirir. O qeyd edib ki, Mədəniyyət Nazirliyi gənc və istedadlı rəssamların dəstəklənməsi, onların beynəlxalq səviyyədə tanıdılması istiqamətində ardıcıl iş aparır.

Sərginin kuratoru, Vladimir Opredelenov isə vurğulayıb ki, rəssamın yaradıcılığı ənənə ilə müasir texnologiyaların vəhdətini nümayiş etdirir və bu yanaşma sərgiyə xüsusi dəyər qazandırır.

Qeyd edək ki, sərgi mayın 15-dək davam edəcək.