Azərbaycanın gənc qadın güləşçisi Ülviyyə Musayeva növbəti böyük uğuru ilə diqqət mərkəzinə düşüb. Bolqarıstanın Samokov şəhərində keçirilən U-15 Avropa çempionatında qızıl medal qazanan idmançımız Azərbaycan qadın güləşi tarixində ilkə imza atıb.

“Qanuntv.az” xəbər verir ki, 33 kq çəki dərəcəsində mübarizə aparan Ülviyyə Musayeva final görüşündə Türkiyə təmsilçisi Yağmur Minaz üzərində tam üstünlüklə — 11:0 hesabı ilə qələbə qazanaraq Avropa çempionu olub.

Bu nəticə ilə Ülviyyə Musayeva U-15 yaş kateqoriyasında Avropa çempionu olan ilk azərbaycanlı qadın güləşçi kimi tarixə düşüb. Onun əldə etdiyi uğur son illər Azərbaycan qadın güləşində aparılan hazırlıq prosesinin və infrastruktur inkişafının mühüm nəticəsi kimi qiymətləndirilir.

Musayeva finala gedən yolda da inamlı çıxışı ilə yadda qalıb. O, əvvəlki mərhələlərdə Polşa və Ukrayna təmsilçilərini “tuş”la məğlub edərək həlledici qarşılaşmaya yüksəlmişdi.

Mütəxəssislər hesab edir ki, Ülviyyə Musayevanın qazandığı bu tarixi nəticə gələcəkdə Azərbaycan qadın güləşinin beynəlxalq arenada daha böyük uğurlara imza atmasına stimul verəcək. Gənc idmançının adı artıq ölkə güləş tarixinin yadda qalan simaları sırasında çəkilir.

Qeyd edək ki, Ülviyyə Musayeva daha əvvəl çimərlik güləşi üzrə də dünya çempionu olaraq diqqət çəkmiş və həmin növdə də tarix yazan ilk azərbaycanlı qız güləşçi olmuşdu.